Chanmariin Aizawl FC lakah phuba an la thei ang em?

September thla tawp khan RG Stadium-ah Honda MPL9-ah Aizawl FC-in Chanmari FC 4-0 in an sawp a, Chanmarians an mualpho hle. I League club hian hun harsaah hnehna an chan ṭhin avangin point 16 hmuin table-ah hmahruaitu an ni a, Chanmari erawh point sarih hmuin paruknaah an awm.

Vawiin tlai dar 4:00 hian Aizawl FC leh Chanmari FC te hi RG Stadium-ah an inkhel leh dawn a, Chanmarians hi AFC coach hlui K. Malsawmkima'n a kaihruai tawh. Chanmari hian I League club lakah phuba an la thei ang em, tih chu hunin a hril ang.

Chanmari hian coach thar Mala hnuaiah game hmuhnawm an khel a, Mizoram Police lakah chance ṭhahnem tak an insiam. Amaherawhchu Chanmari hian hun ṭha an bawhpelh nasa a, goal khat chauh an khung avangin Police nen hian 1-1 in an inhnehtawk. Table-a an dinhmun thlirin Chanmari tan semifinal khel turin khingpuite draw hi a ṭha tawk tawh lo.

CFC hian Police laka an khelh dan ang bawkin 'direct football' an khelh leh a rinawm a, an goal bawh a na dawn. Match hnuhnung bera hrem vanga khel thei lo left back Lalremruata a rawn kir dawn a, mual sir aṭanga an goal nawr a na sawt ang.

Tlarhma lamah Lalhriatpuia'n goal khung mah se chance a hlah hnem a, insiamṭhat a mamawh. Tawnrhiat nei ṭha H. Lalmuankima leh Lalnuntluanga te an khelh chinah an khel ṭha a, coach Rochhingpuia hnuaia player pawimawh Malsawmzuala leh F. Lalnuntluanga te erawh Mala hnuaiah insiamrem hret an mamawh.

Chanmari tana chanchin ṭha awm chu, khelmuala an game hmuhnawm tak avangin fan-te tan auhna tur a awm leh tawh. Police lakah game ṭha tak an khelh theih avangin AFC lakah pawh an zam dawn lo a, ṭantu an nei ṭha ang. Chutihrualin tun hma anga 'Shabash hallelujah' ti dup dup tur chuan result ṭha zawk neih an mamawh.

Aizawl FC erawh season ṭantirh aṭanga tun thlengin an ṭhat dan a la ngai reng a, player siksawi thei turin squad an nei ṭha bawk nen an khelh ṭhat loh ṭumah pawh an la chak zel.

Chutihrualin match hnuhnung ber thlir chuan AFC hi vanduai thei an ni tih a lang a, FC Venghnuai hneh turin ṭum hnih penalty an hmu. I League club hian striker goal khung thei bik an kawl loh avangin an buai ru a, chutihrualin Chanmari lakah erawh goal li ngawt an khung tih hriat a ṭha.

Aizawl FC hi an intum tawhna leh table aṭanga thlirin an buk a rit zawk a, an squad thlir pawhin chak tura rinkai zawk an ni. Amaherawhchu Chanmari hi Mala'n a enkawl tawh a, Leitan pachal hian a club hlui Aizawl FC hneh hi a châk zawng tak a ni ang.