Chelsea leh Jorginho indawr

Graham Potter hnuaia harhtharna chang mek Chelsea chuan an midfielder Jorginho chu contract thar ziahpui tumin an dawr a, mahse, Italy international hian hlawh pun a ngiat niin khawthlang media-te chuan an tarlang.

Kum 30 mi Jorginho hian June 2023-ah Stamford Bridge-a a contract chu a hmang zo dawn a, kar khatah £120,000 a hlawh mek - heti zat tho hlawh tur hian Chelsea chuan an dawr a, mahse, club vice captain hian kar khata £150,000 hlawhtu Cesar Azpilicueta hlawh ang zat hlawh ve a duh niin an sawi.

Chelsea hian June 2023 thoa contract hmang zo tur N'Golo Kante pawh an dawr mek a, mahse, French midfielder hian kum hniha contract pawtsei tura sawmna chu, a aia rei zawk a duh niin an sawi - an inbe ṭha leh ang.

London club hian zanin dar 12:00-ah league match khel turin Brentford an lenchilh dawn a, league match li zet a zawna an chak tawh chu chhunzawm an tum dawn a ni.