Palinaah AS Roma an kaisang

AS Roma chuan Serie A table mawngphah luahtu Sampdoria chu 1-0 in an hneh. Jose Mourinho enkawl Roma hi Italian football inelna sang berah hian palinaah an kaisang, champion an la tum ngam zel.

Thawhṭanni zan Serie A inkhelah Roma tan Lorenzo Pellegrini chuan penalty aṭangin goal awmchhun a khung. Roma hian hmahruaitu Napoli an phak lohna chu point li chauh a ni a, tun kar tawpah team pahnih hi an intawng zui ang.

Sampdoria erawh an che fuh lo chhunzawm, league match 10 aṭangin point thum chiah an la hmu, tun season kal laiah goal nga chauh an la khung laiin an lamah goal 18 a lut tawh thung, an che chhe takzet.

Roma coach Mourinho chuan, "A pawimawh ber chu hnehna chana point thum hmuh hi a ni a, goal engzat nge kan khung tih ai chuan hnehna kan chang em, tih hi a pawimawh zawk. Ka naute hian chak ngei ngei an duh ṭhin avangin ka lawm.

"Season kal laiah match kan khel hnem tawh a, chuvangin season chanve kan hman thlen hmain kan chau hman mai ang tih pawh a hlauhawm. Chawpchilh tak taka match khelh ngai a tam ṭhin si, chuvangin eng inkhel pawh hi a awlsam lo," tiin a sawi.

Thawhṭanni zan inkhel dangah Fiorentina chu Lecce nen 1-1 in an inhnehtawk. Lecce hi relegation zone aṭangin point thum chiahin an him mek, season thara Serie A khelh chhunzawm zel an tum a nih chuan chetsual tam loh a ngai tawh ang.