Swiatek dinhmun a nghet zel

Hmeichhe tennis thuneitu sang Women's Tennis Association chuan world ranking a ti chhuak thar a, a chung berah Iga Swiatek a awm chhunzawm a, amah hnaih bertu Ons Jabeur aiin point 6280 tehmeuhin a hmu sang zawk.

Ashleigh Barty chawlh vangin Swiatek hi kumin tir lamah khan number 2 aṭangin number 1-ah a kaisang. A chung bera a awm chinah hnung lam a la hawi leh lo, season tira number 1 Barty kha la chawl lo tehreng pawh ni se a khum thoin a rinawm.

Polish nula Swiatek hian kuminah match 64 zet hnehna a chang tawh a, ani aia chak hnem an awm lo. Kar hmasa khan San Diego Open final-ah Donna Vekic a hneh a, a hmahruaina hi a sawhnghet zel a ni.

Kum 21 Swiatek-i'n world number 1 ni chungin season tawp a hmang dawn tih a chiang tawh, season tharah pawh a che sual hle a nih ngawt loh chuan a dinhmun aṭanga hnuh thlak hi a harsa dawn hle.