India-in Australia an hneh

T20 World Cup atana inpuahchahna inkhelah India chuan Australia chu Thawhṭanni khan run rukin an hneh. The Gabba-a inkhelah Australia-in vawm hmasak an thlang a, India-in 186/7 runs an siam a, mualneitu hian 180 runs chauhin an chhanglet. Vawiin chawhnu dar 1:30 hian India hian The Gabba-ah tho hian New Zealand an hmachhawn leh ang.

India tana chanchin lawmawm chu Suryakumar Yadav a che ṭha a, ball 33-ah 50 runs a siam. Opener KL Rahul pawhin ball 33-ah 57 runs a siam ve bawk. India ṭhatna hi chu batting a ni a, bowling-ah pawh an che chhe lo.

Australia tan opener Aaron Finch-a'n 76 runs tehmeuh siam mah se middle order-te an che ṭha bik lo a, Indian bowler Mohammed Shami chuan over khat lek vawmin wicket thum a la. India hian T20 match hmasa berah Pakistan an hmachhawn dawn a, October 23 chawhnu dar 1:30-a inkhel tur hian ngaihven a hlawh hle.