Netherlands an chak, hmabak a la harsa

T20 World Cup-ah Netherlands-in beisei phak baka ṭhain bul an ṭan a, an match hmasa bera United Arab Emirates an hneh hnuin nimin khan Namibia chu wicket ngain an hneh. Netherlands hian match hnih khelhah point li an hmu a, amaherawhchu group match hnuhnung berah Sri Lanka an hmachhawn dawn avangin an dinhmun a chiang lo.

Kardinia Park, Geelong-ah Namibia-in vuak hmasak an thlang a, Jan Frylinck-a'n 43 runs a siam zarah 121/6 runs an siam. Netherlands tan Vikramjit Singh a che ṭha a, 39 runs a siam. Over 19.3-naah Netherlands hian 122/5 runs an siam a, wicket thumin an chak.

Netherlands captain Scott Edwards chuan, "Namibia khan target an siam sang lo a, kha aia awlsam khan chak tum mah ila bowler an neih ṭhat avangin kan thei ta bik lo. Super 6 luh beiseina kan neih avangin ka lawm a, theihtawp kan chhuah zel ang," tiin a sawi.

October 20, Ningani chawhma dar 9:30-ah Netherlands-in Sri Lanka an hmachhawn ang a, tlai dar 1:30-ah UAE leh Namibia te an inkhel ang. Group khat aṭangin a sang pahnihin Super 6 an khel ang.

Vawiin hian group B team-te an inlan dawn a, chawhma dar 9:30-ah Ireland leh West Indies te an inkhel ang a, tlai dar 1:30-ah Scotland leh Zimbabwe te an inkhel ang. Match hmasa berah Scotland leh Zimbabwe ten hnehna an chang.