Magpies striker Isak chawl rei dawn

Newcastle United manager Eddie Howe chuan an striker thar Alexander Isak chu a chawlh rei tur thu a sawi chiang. Sweden international hi World Cup hma chuan a inkhel hman dawn tawh lo.

Kum 23 mi Isak hian nipui bazar lai khan beiseina sang tak nen Magpies hi a zawm a, club tan a rintlak viau dawn ni pawhin a lang nghal. Mahse, a malpui hliam vangin atan season chanve chu a zo tia sawi theih a ni.

Howe chuan, "Alex hi World Cup hma chuan club tan a inlan hman tawh lo ang. Sweden tana a feh chhuahna lama a hliam kha a la dam lo, a nihna takah chuan a club thar tan bul a ṭan dawn chauh a, hliam na tak a nei hi ama tan pawh a pawi ang.

"Theih ni se chu inkhel tam se kan duh, mahse kan duh ang ngawtin thil a kal thei bik lo. Dam leh thuai turin kan duhsak a, a ṭhiante tana player ṭangkai leh thawhhlawk a nih chhunzawm leh ngei ka beisei," tiin a sawi.

English manager Eddie Howe kaihhruaina hnuaiah Newcastle hian team nghet tak an din chho mek, an match hnuhnung berah pawh Manchester United nen an inhnehtawk, an vanduai vangin goal an khung lo hlauh zawk a ni.

Zanin dar 12:00 hian St. James' Park-ah Frank Lampard enkawl Everton an mikhual zui dawn a, an inkhel tawk khawp ang. English manager pahnih zingah tuin nge thluak nei ṭha zawk kan hre dawn.

Howe chuan, "Season hmasa lama kan intawnna pawh kha a awlsam lo hle, tunah chuan kan inkhelh hnuhnung ai khan an ṭha lehzual tawh zawk pawhin ka hria. Tharum an ngah a, chumi ven dan tur chu keini pawhin kan ngaihtuah," tiin a sawi.