Mizoram Police ngamtu Venghnuai

Honda MPL9-ah FC Venghnuaiin I Day Football champion Mizoram Police ṭum hnih an hneh. Lalrindika Hmar hote hian phase 1-ah Police hi 1-0 in an hneh tawh a, nimin khan 2-1 in an hneh nawn.

RG Stadium inkhelah hian first half-ah goal a lut lo a, F. Lalrinpuia vanneih ṭum ni se Police-in hma an hruai ang. Valpuia hian freekick aṭanga crossbar a pet per bakah goal ruakah a tauh goal lo.

Venghnuai lam pawh goal hmaah captain Vanlalthanga hmangin an hlauhawm viau. FCV hian defence panga an rawn dah a, Police tlarhmaten chance siam an harsat hle.

Second half-ah Venghnuaiin goal an khung hmasa ta zawk. VL Thanga leh Malsawmzela (Valpuia) te thawhrah sengin minute 51-naah C. Ramnunpuia'n goal hmahruai a khung.

Police hi goal an chhuah hnuah an insiam ṭha a, an goal bawh a na sawt. Minute 69-naah corner kick aṭangin captain Lalfakzuala'n a tauh goal.

Police an phur chhoh hmain Venghnuai captain VL Thanga'n freekick aṭangin a pet goal lehnghal a, Police keeper F. Lalmuanawma'n ball kal dan a chhutsual. Rindika hote an chesual duh tawh lo a, tlarhnung tiphui ṭhain 2-1 in hnehna an chang.

Venghnuai coach Rindika Hmar chuan, "Formation thar atan inzirna hun kan nei tlem chungin ka nauten an man chak a, player zarah point thum kan hmu. Vengnhnuai ṭantute an ṭhahnem ṭhin a, team chakna hnar an ni," tiin Vanglaini a hrilh.

Venghnuai hian point 14 an hmu a, Police zuan khumin pahnihnaah an awm. Lalbiaksanga Colney hoten point an hlawhchhuah zawh loh avangin semifinal kalkawng a awlsam lo ang.

Mizoram Police 2 - 1 FC Venghnuai
MPFC : Lalfakzuala 69'
FCV : C. Ramnunpuia 51'; VL Thanga 70'
MoM : Lalruatfela, FCV