Chhinga Veng hmaah Aizawl FC

Tualchhung football ngai­natute hmuh châk chu beisei aia hmain a thleng dawn a, vawiin tlai dar 3:00 hian Mizoram Premier League Season 6-ah Chhinga Veng leh Aizawl FC an inhmachhawn ang.

League hmahruaitu Chhing­cows leh I League champion AFC te hi tun hnaiah an khelh ṭhat ve ve avangin final-ah pawh intawng se 'dream final' tih theih tur a ni.

Aizawl FC coach Paulo Me­neses chuan, "Tu nge ṭha zawk chu kan hria ang. Keini aiin ni khatin hahdamna hun ngah mah se kan hlauh phah lo. Anni aiin kan team thawhhona a ṭha zawk a, kan phur zawk. Hlau miah loin chak tumin kan khel dawn," tiin an record tihtawp an tum thu a sawi a, Portuguese coach thusawi hian inkhel boruak a tisang sawt ang.

A chung berah Chhingcows
Chhinga Vengin match 10 khelh tawh aṭangin point 26 an sual chhuak a, anmahni hnaih bertu Aizawl FC laka point an hmu hrim hrim a nih chuan league round zawhah hmahruaitu an ni chiang tawh ang. Hneh loh la tawng lo awm chhun leh semifinal thleng tawh awm chhun an ni bawk.

Tlawm loa vawi 22 khel zawn tawh Chhingcows coach Lalsangzuala Hmar chuan an record chhawm nun zel a duh thu Vanglaini a hrilh.

Chhinga Veng hian anmahni hnaih bertu Aizawl FC hi an hneh a nih chuan I League champion hi la tlahniam thei an ni a, Paulo Meneses-a hote hi league round zawhah palinaa an awm a nih ngat chuan team ṭha pahnih hi semifinal-ah an inhmachhawn thei dawn.

Aizawl FC an ṭha
MPL6-ah Aizawl FC-in budget an nei sang ber a, I League club an nih miau avangin an squad pawh ṭha tur reng a ni.

Tun season I League-ah foreigner paruk chhawr theih a ni a, MPL-ah pahnih chauh chhawr theih a nih avangin season ṭan tirha an chhawr I League-a tawn hriat nei ṭha pahnih Alfred Kemah Jaryan leh Kareem Omolaja Nurain thlak nan Europe-a sulhnu nei Romanian midfielder Andrei Ionescu leh Afghan defender Masih Saighani te an hmang a, a ṭul dan a zirin thlakna tur dang an la nei bawk.

I League champion tan Da­vid Lalrinmuana a che ṭha leh tawh a, East Bengal aṭang­a an lak let midfielder hian Bethlehem Vengthlang an sawp ṭumin goal ropui ṭum hnih a khung. Zemabawk North tlangval David-a hian midfield a thunun leh ṭan tawn a, amah ang thoa ball thiam Andrei te nena an in­thlawp chu en man hla tham a ni.

MPL-a tawnhriat nei ṭha Albert Zohmingmawia, H. Lal­muankima leh William Lalnunfela ten khelhna hun an nei tam leh ṭan a, Aizawl FC khelh dan hmang a nghet chho a, khelmual chhungah Portuguese coach Paulo Meneses hna­thawh a lang chho ṭan bawk.

Amaherawhchu I League champion tlarhnung erawh a la fuh tawk lo a, harsatna belhchhah turin Chhinga Veng an hmachhawn hunah hrem vangin defender Lalhriat­renga (Achia) a khel thei lo ang.

Intawnna hmasa
Match 14 chhung khingpuite hneh veka Chhinga Veng chak tluang lai titawptu chu Aizawl FC an ni a, an intawn hmasak ṭum hian 2-2 in an inhnehtawk. Tun ṭumah hian I League champion hian match 22 chhung hneh loh tawng lo Chhingcows record tihtawp an tum tawh ang.

Phase 2-ah I League cham­pion ang thoin Chhinga Veng pawh an inthuam ṭha tawh a, Mizo player ṭha rual awmna team hian foreigner pahnih defender Lassi Adeyemi leh midfielder Olumide Olawale te an neih belh a, an squad a chhah sawt.

Chhingcows tana goal khung tam ber Malsawmfela'n match thum chhung goal a khung tawh lo a, Ramhlun South tlangval hian a club hlui lama goal a khung lo a nih chuan tun season-a match li chhung a zawna goal a khung loh vawi khatna tur a ni.

Sawmfela hian AFC nena intawn hmasak ṭumin a pet goal a, tunah hian goal khung châknain a khat leh tawh - hei hi Aizawl FC tlarhnung tan buaina nih theih rualin Chhinga Veng khelh dan hmang tibuai theitu a ni thei bawk ang.

Vawiin tlaiah India huap pawha inkhel hmuhnawm ni phak tur Lammualah a en theih dawn.