Pathumna ni chunga lawm Neymar

Best FIFA Men's Player award-ah Neymar-a'n pathumna dinhmun a luah a, a tluk loh hi Real Madrid forward Cristiano Ronaldo leh Lionel Messi te an ni. Ronaldo hian kum zawnin pakhatna dinhmun a luah a, a hnuai chiahah Messi a awm.

Mahse, heti chung hian Paris Saint-Germain forward chuan a thlen chinah a lawm tho thu a sawi. Neymar chuan, "Cristiano ka lawmpui a, he chawimawina dawn hi a phuin a dawng awm takin a dawng a ni," a ti a, Brazil captain chuan sawi chhunzawmin, "Ronaldo hian football-ah bung thar a ziak a, chu chu kan zah tur a ni. Messi leh ani nena award kan inchuh phak hi ka tan chuan chawimawina ropui tak a ni," a ti.

Kum 25 mi Neymar hian nipui transfer lai khan khawvela footballer manto ber ni turin PSG chu Barcelona aṭangin pound maktaduai 200-in a zawm a, Barca lam hotute nen an inhmu thiam lo hial. Mahse, Neymar hian tun hnaiah Barcelona president Josep Maria Bartomeu nen ṭha taka an inbiak thu a sawi bawk.

Brazil tan vawi 81 inlana goal 52 khung thei Neymar hian PSG a pan hnuah a zia a chhuah leh der tawh a, French club tan hian inelna hrang hrangah match 11 khelin goal 10 a khung tling der tawh.