Bethlehem VT leh coach Chawnga an inṭhen Zaninah coach nei lo BVT hmaah Dinthar

Bethlehem Vengthlang FC-in match thum a zawna an chak loh hnuah coach Chawngthansanga'n banna a thehlut a, club-in an pawmsak. BVT hian coach Chawnga thlakna tur an la hmu lo a, zanin dar 7:30-a Dinthar FC nen Mizoram Premier League Season 6 inkhel pawimawh taka an inhmachhawn hunah assistant coach Benjamin Lalhriatpuia'n a enkawl lailawk ang.

Inkhel pawimawh

BVT hi phase 1 zawhah point 12 hmuin semifinal khel turin dinhmun ṭha takah ding mah se phase 2-ah point an la hmuh loh avangin relegate thei dinhmunah an ding. An khingpui tur Dinthar FC dinhmun a la chhe zawk a, point 8 chauh la hmuin table mawngphahah an awm. An inkhelh hmasak ṭumin 2-2 in an inhnehtawk a, tun ṭumah chuan chak zawk an awm ngei tawh ang.

Dinthar FC coach Vanlalrova chuan, "Kei ni tan chuan chak loh a thiang tawh lo a, team boruak a ṭha a, kan dinhmun kan hria a, chak duhna tak tak kan neiin ka hre bawk. Vanduai nawn kan tum tawh lo, kan theihna zawng zawngin chak tumin kan khel ang," tiin attacking game an khelh tur thu a sawi.

MPL champion hmasa ber hian Chhinga Veng FC nena hnawhchhuah Nigerian midfielder Clarence Carter chu hrem vangin BVT leh Aizawl FC an hmachhawn hunah an chhawr thei dawn lo.

Rova chuan sawi chhun­zawmin, "Lungleiah Carter-a bul kan ṭantir lo a, hnehna kan chang. Nigerian midfielder bul

ṭan ṭumah vawi hnih kan chak lo zawn. Ani tel lo hian kan ṭha zawk chu ka ti lo a, amaherawhchu a tel lo pawh hian kan ṭha tawk a ni," tiin player pakhat awm loh vanga a buai loh tur thu a sawi.

Chawnga tel loin

Chawnga hian BVT hi I Day Football leh MFA Super Cup-ah match 9 khelh puiin match ngaah hnehna an chang a, vawi khat inhnehtawkin vawi thum an chak lo.

MPL-ah Chawnga'n a tawnhriat hmang ṭangkaiin BVT chu dinhmun sang takah dah mah se Lunglei an zin hnuah ngai an awh tawh lo a, an vawi li chak lohnaa ṭum thum hi match hnuhnung pathuma thleng a ni.

Tuna team enkawltu tur Mabena hian season liam ta khan MPL Under 18-ah BVT a champion pui a, Bethlehem Vengthlang mipuiin vanneihna a ken tel an beisei ang.

BVT secretary Lalruatfela Hmar chuan, "Kan mipuite an nguai a, point hmuh ngei an duh tawh avangin kan theihna zawng zawngin kan khel ang. A hma aia nasa zawkin ṭantu kan mamawh lehzual a, kan chakna thahrui ni leh turin mipuite kan sawm a ni," tiin mipui ṭanpuina a ngen.

Team boruak sawiin Ruatfela chuan, "Match thum chak lo vek mah ila kan team hi kan tlu chhia tihna a ni lo a, kan boruak a ṭha a, a hma aia nasa zawka kan inpumkhat lehzual avangin tawh kan khirh viau dawn a ni. He match hi BVT zia diktak lanchhuahna hun a ni dawn a, point hmu lo a haw kan duh tawh lo," tiin Vanglaini a hrilh.