Klitschko hneh vanga indah sang Joshua

World heavyweight champion Anthony Joshua chuan April thlaa Wladimir Klitschko a tukdawl hma kha chuan champion tak takah a inngaih ngai loh thu a sawi. Kum 28 mi boxer hian Inrinniah Carlos Takam chu a inhnekpui dawn a, Cardiff khawpuia an inhnek hma hian a lo inhrosa lawk.

British boxer chuan, "Klitschko ka hneh hnuah khan champion tak takah ka inngai chauh. Khatiang ang inhnek kha inhnek ropui kan tih chu a ni a, IBF kawnghren hlawh tura Charles Martin ka hneh khan a awlsam em a, champion tak takah ka la inngai lo. Mahse, Klitschko ka paltlang chiah khan champion dik tak ka ni tih ka inhria a ni," a ti.

Joshua hian professional fight vawi 16 a hmachawnnaah kawnghren a hlawh chhuak der a, Charles Martin chu round hnihna lekah knockout-in IBF title a hlawh chhuak. April-ah khan Klitschko chu round 11-naah hneh lehin WBA kawnghren a hlawh chhuak leh a ni.

Vawi 19 inhnek a hmachhawn tawha a khingpui knockout vek thei Joshua hmachhawn tur Takam hi boxer langsar tak a ni hran lo. Kum 36 mi ni tawhin world title langsar a la chuh ngai lo a, vawi 39 inhnek a hmachhawn tawhah vawi 27 chu a khingpui a knockout a, vawi thum a tlawm tawh.