Hamilton a champion hnai?

Formula 1 champion nomawi chawi turin Lewis Hamilton a inpeih tawh a, mahse a la ṭawng fimkhur hle. Tun kar tawp hian Mexican Grand Prix tlan a ni dawn a, Mercedes lehthal tur chuan Ferrari team tan chuan thapui thawha chetchhuah a ngai ngei ang.

Britain driver Hamilton hi a mah hnaih bertu Ferrari driver Sebastian Vettel aiin point 66 zetin an sang fal tawh zawk. Tun season chhungin intlansiak hmabak pathum bak a awm tawh lo. Mexico-ah hian Vettel hian hnehna chang pawh nise Hamilton hi pangana chin a nih phak chuan a champion dawn a, Vettel hi pahnihna ni se Hmilton tan nomawi chawi turin pakuana nih a tawk.

World champion vawi thum ni tawh Hamilton chuan, "Infiamna huangah chuan chetsual theihna a tam a, a bik takin motor intlansiakah bik ngat phei chuan a zawn pawhin point a hmuh loh theih. Nomawi hi ban phak maiah awm tawh angin lang mah se kan kuta a awm hma chuan thlamuan theih a la ni lo," tiin a ṭawng fimkhur hle.

German driver Sebastian Vettel leh Hamilton te hi tunlai driver inel ber an ni a, Vettel hi world champion vawi li ni tawhin kuminah Hamilton a champion ve leh a nih chuan champion nomawi an neih zat a intluk chiah ang.