Zirtea hnuaiah Chanmari West chak nghal

Mizoram Premier League-a tawnhriat nei la nei lo coach H. Lalnunzira kaihhruaina hnuaiah Chanmari West-in MPL-a vawi hnih champion tawh leh champion lai Chanmari FC 2-1 in an hneh.

Thawhlehni zan inkhelah West Warrior-in Lalramluaha leh Benjamin Cooper te goal khung hmangin first half-ah 2-0 in hma an hruai a, second half-ah Chanmari FC-in thapui chhuah mah se Ṭhasiama hmanga goal khat an khung bak an khung belh thei lo.

Goal 2 hlu bik

Chanmari West FC-in pangngai takin bul an ṭan a, Chanmari FC erawhin bul an ṭan fuh lo. Minute 6-na lekah Chanmari defender Joseph Lalnunpuia ball pe chhuak tur chu Ramluaha'n dang hmanin hemi per hi goal-ah a lut a, Shil­long Lajong midfielder hlui hian West Warrior tana a goal hmasa ber a khung.

Chanmari FC-in awmze neiin an khel thei lo a, West Warrior defender tan hna harsa a awm lo. Minute 38-naah Chanmari West keeper Lalmalsawma petchhuah chu Chanmari defender te chetsual vangin Benjamin Cooper zawnah tla fuhin, Liberian forward hian la lut nghalin keeper chiah a hmachhawn hnuah West Warrior goal hnihna a khung.

Vanneihna

Chanmari FC coach H. Vanlal­thlanga'n halftime a hmang ṭha a, second half-ah an khelh dan hmang a dang nghal.

Minute 51-naah Ṭhasiama'n box pawnah ball petna tur hmun awl a insiam hnuah a pet goal a, Chanmari FC an phur phah hle.

Pune City aṭanga an hawh Gani Ahammed-a'n a ranna hmangin Chanmari West tlarhnung a tibuai a, amaherawhchu goal hmaah a kum naupanna a lang. Chanmari forward Gani goal khung tur chu West Warrior keeper Malsawma'n a dan sak a, hemi hnua a chance neih ṭhat chu crossbar pet per nan a hmang leh bawk.

Chanmari goal nawr a na a, Lalmuanzova ball tauh chu defen­der H. Lalhlimpuia'n pet­chhuah a tumna lamah crossbar a per leh a, Chanmari West an him hram. MPL5 best defender Lalhlima'n ball a tauh chhuak hnem a, a kuta a hnek fuh vanga penalty a chawi lo erawh a vannei hle.

MPL champion vanduai zanah coach thar Zirtea enkawl Chanmari West an vannei a, point thum hlu tak an hlawh chhuak.

Engtin zel?

Chanmari FC-in phase 2 chinah point an la hmuh loh avangin point 12 hmuin palinaah an la inhamtang hram. MPL champion lai tan rilru nuama awm theih a ni tawh lo a, an khelh hmabak match li a pawimawh vek.

Thlanga hote hian October 27, Zirtawpni zan hian Mizoram Police an hmachhawn dawn a, semifinal khel tur zawnna ang hiala ngaih theih a ni. Chanmari khelh hmabakah hian Bethlehem VT, Ramhlun North leh Dinthar FC te an awm bawk.

Chanmari West-in Zirtea hnuai­ah point thum an hlawh chhuak a, semifinal khelhna tur khawp point erawh an la hmu chhuak lo. West Warrior hian Zirtawpni tlaiah anmahni ang bawka point 11 hmu Ramhlun North an hmachhawn dawn a, inkhel pawimawh bik a ni ang.

Zirtea hote hian Ramhlun North nena an inkhelh zawhah Mizoram Police, Aizawl FC leh Bethlehem VT te an la hmachhawn dawn a, hmabak a la harsa hle. Amaherawhchu, Chanmari West hi an veng pa Zirtea hnuaiah an khel a, veng mipui an phur thar avangin khelmual pawn leh chhungah hma an sawn. Lammualah West Warrior an zai rual leh ta.