Arsenal leh United an tlang

Thawhlehni zan League Cup last 16 inkhelah Arsenal chuan Championship club Norwich City nen extra time an khelh hnuah an tlang hram a, inkhel dangah Manchester United erawhin Premier League club Swansea City lakah harsatna nei loin 2-1 in hnehna an chang.

Arsenal manager Arsene Wenger-a'n North London club kum 21 a enkawl chhungin League Cup a la chawi ngai lo a, Norwich lakah pawh league lama a player chhawr ṭhin ho a awltir. Manchester United manager Jose Mourinho erawhin a dan pangngaiin chak loh a duh lo a, a player ṭha ṭhenkhatin khelmual an lut.

Champion zia

League Cup champion lai Manchester United-in an nomawi humhim an tum. Jose Mourinho-a'n player langsar

ṭhenkhat chawlhtir mah se an khingpui hi Swansea an nih avangin Marcus Rashford, Anthony Martial leh Jesse Lingard-te tlarhmaah an inkawp nghal a, hun tawp dawn lamah striker palian Romelu Lukaku khelhtir a ni bawk.

Khualmualah England international Rashford-a'n Lingard goal hmahruai khung turin ball a khen sak zauh a, team game mawi tak an khelh hnuah English midfielder Lingard bawkin an goal hnihna a khung bawk.

Portuguese club Mourinho-a'n Huddersfield an hneh loh ṭumin a player-te chu rilru puthmang dik lo tiin na takin a sawisel a, Swans an hneh hnuah erawh a naute khelh danah a lawm tawh thung.

Kum 54 mi Mourinho chuan, "Kan rilru puthmang a dik ta, kan inpumkhat ṭha a, inkhel thunun tak chunga hnehna kan chang thei kha a lawmawm hle," tiin a sawi. Mourinho hian Chelsea vawi hnih a enkawl chhung leh United a enkawl tawh chin nena belhkhawmin English football-ah match 400 a naute a kaihhruaina chiah a ni.

Swansea manager Paul Clement-a'n Leicester City hneh lo hlim a player-te siksawi viau mah se an kalfuh thei rih lo. Welsh club hian tun season chhungin inelna hrang hrangah an khelmuala an match hnuhnung pangaah vawi li an chak lo a, league lamah pawh 15-na dinhmun an luah hram.

Gunners an vannei

Emirates stadium-a inkhel­ah substitute Edward Nketiah chuan Arsenal tan hun tawp dawnah an siphurh a sut a, extra time an khelh hnuah chakna goal khung lehin 2-1 in hnehna a chanpui.

Championship-a parukna nilai Norwich tan midfielder James Maddison chu hmuh­nawm khawpin a khel ṭha a, kum 22 mi Maddison hian Josh Murphy-a'n goal a khung theih nan through ball ṭha zetin a pass a, English forward Murphy hian Arsenal tana a vawi khat khelhna goalkeeper Matt Macey chu chiang zetin a chip khum.

Arsene Wenger-a'n Premier League-a Everton 5-2 a an hneh ṭuma inkhel bul ṭantu player 11 hlawk a thlak dang­lam a, rawlthar rual karah Ma­thieu Debuchy, Elneny, Jack Wilshere, Theo Walcott leh Olivier Giroud te an inlan bawk.

Gunners hian ball chang tamin inkhel thunun mah se goal hmaah an vannei tawk lo a, minute 84-na thleng goal an phurh avangin Norwich hian kum 22 chhunga a vawi hnih nan quarterfinal luh an beiseina a sang hman hle.

Mahse, England Under-19 international Nketia­hat chuan khelmual a luh hnu lawkah corner aṭanga ball rawn kal chu an si phurh sut nan a tauh goal a, Wenger-a'n Arsenal a enkawl hnua piang ve chauh Nketiahat bawk hian hnai set sawt aṭangin chakna goal a khung bawk.

Arsenal manager Arsene Wenger chuan, "Goal khung thei kan mamawh a, chuvangin Nketiahat hi kan lei," tiin goal hnih khungtu Nketiahat chu goal khung thiam bik a nih vanga lei a nih thu a sawi a, Norwich lakah khan hnehna chan an duh em avangin hmatawng pariat ngawn an inlan thu a sawi bawk.

Kum 18 mi Nketiahat hian Chelsea aṭangin 2015 khan Arsenal hi a zawm a, September 28-a Gunners leh Belarusian club Bate Borisov ten an inkhelh ṭum khan minute 89-naah tlan luhtir niin tun ṭum hi club tana a inlan vawi hnihna chiah a ni.

League Cup Last 16
Inkhel Results
Bournemouth 3 - 1 Middlesbrough
Arsenal 2 - 1 Norwich City
Bristol City 4 - 1 Crystal Palace
Leicester City 3 - 1 Leeds United
Swansea City 0 - 2 Manchester United
Manchester City 0 - 0 Wolve