Pliskova-i'n semifinal lut

Hmeichhe tennis thiam zual pariat te tana buat­saih Women's Tennis Association Finals khelh mekah Karolina Pliskova chuan a match hmasa pahnihah hnehna changin White Group aṭanga semifinal inhlangkai thei hmasa ber a ni.

Thawhlehni zan khan seeded pathumna Plis­kova hian Wimbledon champion Garbine Muguruza chu darkar khat leh minute hnih chhung lekin 6-2, 6-2 in a hneh a, a match hmasa zawkah Venus Williams chu 6-2, 6-2 bawka a hneh tawh avangin a sang pali zingah hian a inhlangkai.

Czech Republic nula Pliskova chuan, "Season hmasa khan semifinal lut tur chuan group match hnuhnung bera chak a ngai a, a hahthlak duh hle. Kuminah erawh match hmasa pahnihah hnehna ka chan theih avangin nuamsa deuhin match thumna chu ka khel thei tawh ang," a ti. Pliskova hian Ostapenko a hmachhawn leh ang.

Singapore Indoor Stadium-a inkhel dangah Venus leh French Open champion Jelena Osta­penko te darkar thum leh minute 13 chhung zet an inkhelh hnuah kum 37 mi Venus hian 7-5, 6-7 (7/3), 7-5 in hnehna a chang. American Venus leh Spanish Muguruza te hi an match hnuhnung berah an intawng dawn - a chak zawk tan Pliskova hnung zuiin semifinal luhna kawng a la inhawng.

Grand Slam vawi sarih champion tawh Ve­nus hian kuminah major tournament final vawi hnih a khel tawh a, a vanneih tawk loh vangin a champion zo lo. Venus chuan, "Hnehna ka chang a, a bak sawi tur a awm lo. Ka vannei zawk pawh a ni thei, a pawimawh zawk chu beisei nei theia ka la awm hi a ni," tiin a sawi.

Kumin WTA Finals hi a vawi 47-na a ni a, player pariatte chu White Group leh Red Group-ah ṭhen hran niin an inkhelh kual vek hnuah a sang pahnih zelin semifinal an lut dawn a ni - October 29, Pathianni zan hian final khelh tur a ni ang.