Barca an chak nuamsa

Copa del Rey fourth round first leg-ah Barcelona tan hnehna chang turin harsatna a awm lo a, Catalan club hian third division Real Murcia chu 3-0 ngawtin an sawp. Barcelona tan an player chhuanvawr pahnih Lionel Messi leh Luis Suarez chu squad-ah pawh dah an ni lo a, Gerard Pique leh Ivan Rakitic chu bench lamah hun hmantir an ni thung.

Real Murcia khelmuala lenglut Barcelona hian an beisei angin goal erawh an khung lawk lo. Minute 44-naah Paco Alcacer chuan Catalan club goal hmahruai a lu hmangin a khung chauh a, hemi hnuah erawh Barca an hawikir tawh lo. Chawlhlawk hman a nih aṭanga minute sarih hnuah Gerard Deulofeu a inlar ve leh a, Everton winger hlui hian a mimal thawhrah sengin an goal hnihna a khung.

Minute 56-naah Barcelona tana a match hmasa ber kheltu kum 22 mi Jose Arnaiz chuan Catalan club-ah hmun chan a phu tih pholangin goal a khung nghal a, Barcelona an chak chiang. Barca hian Copa del Rey hi season thum chhung chu a zawnin champion nan an hmang tawh a, November 29-ah second leg hi an khel leh chauh ang.

Ernesto Valverde kaihhruaina hnuaiah Barcelona hian La Liga-ah pawh point liin hma an hruai fal mek a, inelna hrang hranga an match hnuhnung 13-ah vawi 12 hnehna chang tawhin vawi khat an khingpui an inhnehtawkpui bawk.

Barca coach Ernesto Valverde chuan, "Arnaiz hi mahni inringtawk tak a ni a, goal khung châkna a nei a ni. Kan ṭhat pui ka rin avangin B-Team aṭangin kan la chho a, ama tan pawh hetiang hun tawn hi a ṭha a ni. Goal ropui tak a khung a, kan bulah khel theihna hun ṭha kan siam sak ang," tiin goal khungtu Jose Arnaiz a fak.

Zanin dar 1:00-ah Real Madrid chuan Spanish Cup round of 32 hi an khel ve dawn bawk a, third division club Fuenlabrada an lenchilh ang.

Copa del Rey
fourth round
Inkhel Results
FC Cartagena 0 - 3 Sevilla
Numancia 2 - 1 Málaga
Real Zaragoza 0 - 2 Valencia
Getafe 0 - 1 Deportivo Alaves
Real Murcia 0 - 3 Barcelona
Cádiz 1- 2 Real Betis