Khelh ṭhat manah Mooy tan £5

Huddersfield Town fan Adam chuan Manchester United an hneh ṭuma khel ṭha tak Australian midfielder Aaron Mooy chu lawmthu sawi nan £5 (Rs. 429.66) a pe! John Smith's Stadium-a inkhelah khan Premier League kai thar Huddersfield hian rin loh takin United chu 2-1 in an hneh a, Mooy hi man of the match-ah thlan a ni.

Inkhelh zawh hnu lamah Huddersfield Town fan Adam hian stadium chhungah £5 hi a chhar a, amaha hmang riral mai loin Mooy hnenah hian a thawn ta a ni. Adam chuan lehkha ziak thlapin, "Mooy a tan he pawisa hi ka rawn thawn a, ani puala ka tih chhan chu a khelh ṭhat leh goal khung vang a ni," a ti! Adam hian a pawisa chhar Mooy hnena pek a duh chhan chu a pain, "I ta ni lo chu i la tur a ni lo," tia a zirtir vang a nih thu a ziak tel bawk!

Huddersfield director Sean Jarvis chuan Adam-a lehkha ziah hi twitter lamah a tarlang a, hetah hian a tawp mai lo. Mooy chuan, "Adam nangmah hmuh ngei hi ka duh a ni," tiin twitter lamah pawisa thawntu naupang hi hmuh a duh thu a tarlang ve bawk. Huddersfield-in United an hneh khan kum 65 hnua Red Devils an hneh hmasak ber a ni a, an goal hmahruai kha kum 27 mi Mooy-a khung a ni.