An ramah Federer a inlan

Swiss star Roger Federer chuan Thawhlehni zan khan Swiss Indoors Tournament-ah a inlan a, Frances Tiafoe lakah 6-1, 6-3 a hnehna changin second round a inhlangkai.

Basel-a inkhelah world number 2 Federer hian a tir aṭanga tawp thlengin inkhel a thunun a, American rawlthar hian Federer hi a chhaih buai phak lo. Federer hian second round-ah chuan tawnhriat nei tawh Benoit Paire a hma-chhawn leh ang.

Kum 35 mi Federer hian Swiss Indoors Tournament nomawi hi vawi sarih a chawi tawh a, season hmasa khan hliam vangin a khel thei lo thung. Federer leh Rafael Nadal te world number 1 ni chunga season khartu zawk nih tumin an la inum mek a, tun inelnaah hian hliam vangin Nadal a inlan thei lo. Federer hi a champion a nih chuan ranking lamah Nadal a hnaih zual sawt dawn a ni.

Inkhel dangah seeded pathumna David Goffin chuan 6-2, 7-5 in Peter Gojowczyk a hneh. Belgium tlangval Goffin hian ATP World Tour Finals khel turin a dinhmun a sawhnghet chho mek a, second round-ah Hyeon Chung nen an inkhel leh ang.