Khawi lam kawng nge an zawn dawn le! Mizoram Police Vs Chanmari FC
Mizoram Premier League Season 6 semifinal khel tur leh relegate tur a la hriat loh avangin boruak a sang chho a, zanin inkhel tur hi MPL inkhel hmuhnawm ber tur zinga mi a ni. Mizoram Police leh Chanmari FC te zanin dar 7:30 hian an inhmachhawn dawn a, Lammualah tualchhung football ngainatute an pungkhawm ang.
Mizoram Police-in hnehna an chan chuan semifinal an hnaih sawt ang a, Chanmari FC dinhmun erawh a derthawng lehzual dawn. Chanmari an chak thung chuan MPL champion lai hian knockout stage hi an thlen chhoh leh theih a rinawm a, Police hmabak a harsa thung ang.
Champion lai talbuai
Chanmari FC hian nomawi humhim tumin season bul an ṭan a, amaherawhchu September 19-a Ramhlun North FC 2-0 a an hneh hnuah match ruk chhung chak hmel an hmu tawh lo.
MPL champion lai Chanmari hian an foreigner striker Alex Whittemore chu goal hmaah a hriam tawk loh avangin an chhuahtir a, Liberian striker awm loh hnuah match thum khel leh tawhin an chak lo vek. Chanmari hian point 12 hmuin semifinal khel turin team dang result-ah innghah la ṭul lo mah se an hmabak a hau tak ta hle.
Manager H. Vanlalthlanga kaihhruaina hnuaiah Chanmari FC hian MPL2 leh MPL3-ah league hmahruaitu an ni ve ve a, a hmasa zawkah hian an champion zui bawk. Tun season-ah erawh Thlanga hote an talbuai a, Police an hmachhawn zawh hian Bethlehem Vengthlang, Ramhlun North leh Dinthar FC te an la hmachhawn dawn. An match hnuhnung bera Dinthar FC nena an inkhel tur hi semifinal lut tur zawnna ni loin relegate tur zawnna a ni thei a, hei hi season ṭantirha thleng thei lo tura ngaih a ni.
Police an phur thung
Mizoram Police-in match hmasa panga aṭangin point khat chauh an hlawh chhuak a, goal 18 zet an chhuah bawk. MPL6 Qualifier champion hi relegate leh nghal tur ni mah se coach thar Lalbiaksanga Colney kaihhruaina hnuaiah harhtharna an chang.
Police hian match BS-a Colney hnuaia match nga an khelhah point 13 an hlawh chhuak a, table mawngphah aṭangin semifinal khel pha chinah an invawrh chho a, an record hi a 'ropui hle' tih baka han sawifiah theih dan pawh a awm chuang lo.
Mahse...
Chanmari coach Thlanga hian Mizoram Police lakah record ṭha tak a nei a, MPL-ah vawi nga hmachhawn tawhin hnehna a chang vek. Hei chauh hi a la ni lo, kumin I Day Football-ah Chanmari hian Police hi 4-0 in an sawp a, phase 1-ah 4-1 in an sawp leh bawk.
Chanmari FC tana phurna awm turin Emmanuel Chijioke Igwebuike chu Chanmari Derby-ah a inlan tawh a, Nigerian midfielder awm hnuah Thlanga hote goal nawr a na hle. Hei bakah hian ISL Pune City aṭanga an hawh Gani Ahammed chu danglamna thlen theih tur khawpin Lammualah a tlangnel ṭan a, winger tlan chak pahnih Lalmuanzova leh Vanlalbiaa Chhangte bakah winger ball thiam Ṭhasiama te an awm avangin Police tlarhnung tan buaina tham a tling ang.
Police lam hi
Mizoram Police erawh an phur lai tak a nih avangin Chanmari FC lakah result ṭha nei lo mah se an zam phah lo. Police coach Lalbiaksanga Colney chuan, "Chanmari hi team ṭha an ni nachungin kan game ṭhat tluan lai a nih avangin kan hlau lo. Kan attacking hi kan inchhuanna a ni a, hneh ngei kan tum," tiin chak a inrin thu a sawi.
Tun season-a Police buaina ber chu an tlarhnung a ni a, goal 28 zet an chhuah tawh. BS-a Colney hian tlarhnung siam ṭhat tumin hma a la a, defender pahnih Zomuanpuia leh Toky Zomuanpuia te a la lut a, tunah hian Mizoram aiawha khel pha Lalhmunmawia a dam leh tawh bawk. Police coach BS-a chuan, "Kan tlarhnung pawh kan siam ṭha tawh. Kan hotute an phur a, player te an phur a, coaching staff pawh kan phur," tiin team thar an nih thu a sawi.
BS-a Colney thusawi ang hian Police hi an danglam tawh a, tlarhmaa awm Lalbiakhlua leh Lalsangbera ten inrintawkna an nei leh tawh a, F. Lalrinpuia leh Lalfakzuala te an la ṭhat reng bawk avangin eng team tan pawha dan huphurhawm tur an ni.