Everton aia hriam Chelsea

Premier League champion Chelsea chuan Everton 2-1 a hnehin League Cup quarterfinal an lut. Nilaini zan inkhelah Blues tan Antonio Rudiger leh Willian ten goal an khung laiin Toffees goal neihchhun hi hun tawp hamrik rik ruala Dominic Calvert-Lewin khung a ni thung.

Everton hian Ronald Koeman an ban hnuah manager nghet an la nei lo, team enkawl lailawktu David Unsworth chuan chak lo mah se a naute khelh dan chu fak tlak an nih thu a sawi chhuak.

Vanduaina

Stamford Bridge-ah Toffees hian chak tum ngamin an khel a, forward Kevin Mirallas leh Wayne Rooney te goal khung tur chu Blues keeper Willy Caballero chuan

ṭha zetin a dan sak a, Ademola Lookman chuan goal bar a pet per dawp bawk - an vanneih ni chu nise goal khung thei tur an ni.

Everton enkawl lailawktu David Unsworth chuan, "Kan chak loh avangin ka lawm lo, mahse huaisen takin kan bei a, kan theihtawp kan chhuahna avang kha chuan ka lawm. Team ka enkawl chhung chuan khatiang khan kan khingpuite kan beih zel ka beisei," tiin a sawi. Everton hian Pathianni zanah Leicester City an lenchilh ang.

Vanneihna

Antonio Conte-a'n nipui laia pound maktaduai 35 zeta a lakluh midfielder Danny Drinkwater a chhawr thei tawh a, kartawp inkhela goal hnih khungtu Michy Batshuayi-a'n inkhel bul a ṭan bawk. Mahse, Foxes player hlui leh Belgium international striker te hian beisei angin an khel chhuak lo.

Chelsea hian first half-a an goal khung an venghim rei thei a, hun tawp dawn hnaiah goal khat chhuah ve mah se goal zawna an pet vawi thum zinga pahnih a luh miau avangin a vawi 21 nan quarterfinal an lut - an tluk loh chu Arsenal (26), Spurs (23) leh Liverpool (22) te chiah an ni.

Blues manager Conte chuan, "Kan khel ṭha, a bik takin inkhel chawhma lamah khan hun ṭha kan insiam thei a, goal kan khung bawk. Kan khel ṭha tlang a, a bik takin rawlthar Charly Musonda, Kenedy leh Ampadu te khan min ti lawm hle a ni," tiin a sawi.