Zaninah MBL3 player lilamna

Hrangbana Memorial Mizoram Badminton League Season 3 player lilam­na chu zanin dar 8:00 hian Synod Con­ference Hall-ah neih a ni dawn a, 'Zonet Rinna' channel-ah pekchhuah a ni ang.

MBL season hnih neih tawhah team nga ve ve an inel a, season thum­na aṭangin team pariat an inel dawn. Aizawl khaw chhung aṭangin team paruk Chanmari Evening Stars, Hlimen Smashers, Kanan,

Mission Veng, Tuikual Shuttlers leh Zotlang te an tel ang a, Aizawl khaw pawn aṭangin Champhai Ralte Villa BC leh Southern Acers Saiha an tel bawk ang.

Inelna kalphung

MBL3-ah hian team pariat te chu pool pahnihah team li ve ve a ṭhendarh tur a ni. Team pali te hi vawi khat ṭheuh an inkhelh kual hnuah a sang ber leh a dawttuin semifinal-ah an khel ang.

Kumin inelnaah hian kum 35 chung lam bik inelna tihtawp a ni a, Under 19 Boys Singles telh a ni thung. MBL-a inelna turte chu Men's Singles match hnih bakah Men's Doubles, Mixed Doubles leh Under 19 Boys Singles match khat ṭheuh khelh a ni ang.

Inelna hi November 13-24 chhung hian Electric Veng YMA Hall-ah khelh tur a ni.

Lilamna chu

MBL team khat hian player leina turin Rs 50,000 ṭheuh an nei a, lilam zan hian player pali ṭheuh - men's player pahnih, women's player pakhat leh under 19 player pahnih an la thei ang.

Team pakhat aia tamin player pakhat an lei tumna zat a inang a nih chuan ṭhum vawr hmanga chinfel tur a ni. Kumin hian MBL khel turin player 61 an inziak lut a, lilam zan hian player 32 chiah thlan tur ni mah se thlan loh player-te hi auction pawn lamah an inchuh zo vek tura rin a ni.

Nikuma MBL player auction-a manto pahnih chu Mizoram number 1 RK Manajit Singh leh number 3 Lalmuanawma te an ni a, kumin pawh hian inchuh tur zinga mi an ni. Heng player pahnih bakah hian North East Zone C'ship-a Mizoram tana hming langsar Samuel Lalnunmawia leh Lalduhawma te lak nan sum sen aṭul bawk ang.

Hmeichhe lamah chuan season dang ang thoin F. Vanlalhriatpuii leh Lalrinzuali te hming a langsar a, Under 19 lam erawh hriatthiam a la har deuh. Club tin hian MBA hnuaia inziak lut player bakah hian state pawn player pakhat pakhat ṭheuh an la thei a, Mizoramah Indian shuttler ṭha kan hmu leh dawn tihna a ni.

November 2-ah hian team list theh­luh tur a ni a, team ṭhenkhatin state pawn player an lak tur tichiang tawh mah se hming thehluh hma chuan puanzar phal a ni lo.

Player Auction
Team awm zat 8
Team khat lei theih zat 4
Men's 2
Women's 1
Under 19 1
Pawisa hman theih zat Rs 50,000
Zanina player hralh tur zat 32