Chhinga Veng ngamtu Aizawl FC

I League champion Aizawl FC-in nimin tlai inkhelah Chhinga Veng FC 2-0 in an hneh.

Mizoram Premier League Season 6 hmahruaitu Lalsangzuala Hmar hoten match 23-naah hneh loh an tawng a, league boruak a san phah hle.

Chhingcows-in Sanga hnuaiah record an neih ṭhat avangin champion turah dah an ni hman a, tunah erawh ngaihtuah ṭhat a ngai ta.

Goal mawi

Aizawl FC winger H. Lalmuankima'n minute 16-naah box pawn aṭangin a pet kum lut a, Chhinga Veng keeper Zothanmawia'n a en liam.

MPL6 hmahruaitu aiin I League champion an che ṭha zawk a, Romanian midfielder Andrei Ionescu-a'n chance ṭha bik a insiam chu defender K. Lalthlahlova'n a dang hman.

AFC winger Albert Zohming­mawia'n box chhungah R. Lal­dinliana a bum a, Chhinga Veng defender hian titlu mah se referee-in penalty a pe lo.

Chhinga Vengin first half-ah chance ṭha an nei lo a, goal zawna vawi hnih an pet pawh keeper Avilash Paul tan dan harsa a ni lo.

An innawr ta

Aizawl FC-in second half-ah bul an ṭan ṭha leh a, Masih Saighani-a'n goal ruakah hnai tak aṭangin a pet over a, Afghan defender hian freekick aṭanga chance ṭha dang a hlah leh bawk.

Chhinga Veng an insiamrem a, AFC keeper Avilash-a'n hna a ngah a, Laldampuia tauh goal tur a dan sak avangin team chhandamtu a ni.

Chhingcows goal nawr a na zui a, Malsawmfela leh Khaw­pui­mawia ten AFC tlarhnung an ṭhiah hnuah substitute Vanlallawma pet chu midfielder H. Lalbiakthanga'n a dang hman.

Chhinga Vengin goal nawr tum ngial mah se Portuguese coach Paulo Meneses-a'n tlarhnung a rem phui ṭha a, injury time-ah goal khungtu MK-a cross chu substitute Jonathan Lalrawngbawla'n chak nemngheh nan a tauh lut.

Champion tur AFC?

Aizawl FC coach Paulo Meneses chuan, "Kan hneh ang tih ka sawi lawk kha, Chhinga Veng hi kan hneh thei tih ka hria a ni. Kan chak avangin ka lawm a, tunah chuan champion rinkai ber kan ni," tiin Vanglaini a hrilh.

I League champion-in point 19 hmuin pahnihnaah an inbeng bel a, chhiarkawp danin semifinal lut lo mah se AFC hi knockot stage lut tawha ngaih theih an ni.

ZoFooty Statistics
Chhinga Veng 0 - 2 Aizawl FC
AFC : H. Lalmuankima 16';
Jonathan Lalrawngbawla 90+5'
MoM : H. Lalmuankima, AFC
49% Ball Possession 51%
13(9) Shots (On Target) 11(6)
3 Yellow Card 3
0 Red Card 0
Powered by Rainbow Multibrand Mobile Showroom