FIFA U17 World Cup England leh Spain-in final an lut
FIFA U17 World Cup final khel tur a chiang ta - Nilaini zan khan England leh Spain chuan an khingpui ve ve hnehin final an lut a, October 28 zanah ram pahnih hi World champion nih inchuhin an inhmachhawn ang.
England-in final lut turin team ṭha zawka ngaih Brazil chu 3-1 in an hneh a, Young Lions goal hi Liverpool rawlthar Rhian Brewster khung vek a ni. Spain-in tun tournament-a khel ṭha tak Mali chu 3-1 thoin an hneh bawk a, Barcelona forward Abel Ruiz chuan goal hnih a khung.
Lions hahum chu
Guwahati-a ruahsur nasat avangin Salt Lake Stadium-ah England leh Brazil inkhel tur sawn a ni - England hian Guwahati-a khelh an pawiti lo a, Brazil lamin an duh lo thung. Brazil duh angin FIFA an kal a, an khelmual hman duhah ngei Brazil an chak zo chuang lo.
Mipui 63,881 pungkhawm hmaa inkhelah England-in goal khung turin an nghah rei a ngai lo. Minute 10-na lekah Brewster chuan Callum Hudson-Odoi hnen aṭanga a ball hmuh chu hmahruaina goal ni turin a khung. Brazil-in minute 11 hnuah Flamengo defender Wesley hmangin chhanglet mah se Brewster chet ṭhat zan an tawng a, Reds forward hian goal hnih dang a khung chhunzawm.
Brewster a ropui
Rhian Brewster-a'n quarterfinal-ah USA lakah hattrick a siam tawh a, FIFA tournament-ah a zawna match hnih hattrick siam hi a namai lo. Liverpool forward hian goal sarih khung tawhin top scorer a ni mek a, quarterfinal hmain goal khat chiah a khung. Brewster-a pa chuan, "USA nen an inhmachhawn hma khan 'i theihna i pholan a hun ta' ka ti a, game boruak sangah player ṭha an dinchhuah ṭhin thu ka hrilh bawk. Min chhanna chu hattrick a ni," tiin a fapa a chhuang hle.
England boss Steve Cooper chuan, "Brewster hian fak a phu a ni. A goal khung mai piah lama ropui chu a team tana theihtawp a chhuahna kha a ni. Number 9 hmanga na taka goal nawr kan duh a, kan duh ang takin min khelhtir a ni," tiin a nau a fak a, "Mimal hmingṭhatna zawngin tumah kan khel lo a, kan ram tana theihtawp chhuah tlan hi kan duh ber chu a ni," a ti.
Spain chakna Ruiz
Mali-in a zawna FIFA U17 World Cup final luh an tumna chu Spain hmaah a thamral a, Abel Ruiz an ngam lo. Mali penalty area-a Cesar Gelabert tih tluk a nih hnuah Spain-in penalty an hlawh chhuak a, Abel Ruiz-a'n goal-a chantir turin harsatna a tawk lo. Minute 43-naah Ruiz leh Cesar bawk an inlar a, Barcelona forward Ruiz hian Cesar-a ball siamsak chu goal-ah a chantir.
Kum 2015 final-a Nigeria ngam lotu Mali-in 'comeback' beisei mah se Cheick Doucoure goal khung chu goal-ah pawmsak a ni lo a, Mali an hnual tih hai rual a ni lo - Doucoure goal khung hi replay-a en chuan line-a pel ngei tih a lang. Mali goal khung pawmsak an nih loh hnu lawkah Spain tan Ferran Torres-a'n a khung chhunzawm leh a, minute 74-naa Lassana N'Diaye goal khungin awmzia a nei tawh lo.