TFL 2 nomawi inchuh tur Armed Veng leh Kolasib

Mizoram Taekwondo Association (MATA) hnuaia inelna lian ber GIG Motors Taekwondo Fight League 2 semifinal chu Electric Veng YMA hall-ah khelh zawh a ni a, Armed Veng Warriors leh Kolasib Fighters ten hnehna an chang.

Nilaini zan inkhelah Armed Veng Warriors-in an chet ṭhat kal tluang an chhunzawm hram zel. Armed Veng hi Zopa Goldsmith Chawnpui nen round nga an inbeih chhungin 90-90 in an inhnehtawk; round khat pek belh an nih hnuah 113-100 in hnehna an chang a, a vawi khat nan final an lut.

Semifinal lehlamah Kolasib Fighters chuan vawi hnih an hneh loh tawh Ramhlun Sporting Club Fighters chu 89-77 in an hneh. Aizawl pawn team awmchhun hi kum zawna final lut thei awmchhun an ni nghal a, Inrinni zanah Armed Veng nen nomawi an inchuh ang.

TFL 2-ah hian lam intihsiak (dance battle) chu zawh fel a ni tawh a, Nilaini zan khan Emerge leh GOV an inlan. Crew paruk inelin vawi hnih ṭheuh an lam a, final khelh zan hian result puan nghal a ni bawk ang.