Spurs lakah Hammers tho chhuak

West Ham chuan League Cup quarterfinal lut turin Tottenham Hotspur chu an khelmualah an va luhchhuah. Slaven Bilic-a naute hian goal hnih an phurh hmasak zet hnuah 3-2 in hnehna an chang let thei a ni.

Wembley Stadium-ah Spurs lamin chawlhlawk hmain Moussa Sissoko leh Dele Alli te goal hmangin si hnih faiin hma an hruai a, striker rinrawl Harry Kane leh captain Hugo Lloris te tel lo pawhin Mauricio Pochettino naute hi nuamsa taka chak tura ngaih an ni.

Amaherawhchu, Premier League kaithar Brighton laka mualpho hlim West Ham an beidawng duh lo. Hammers tan striker Andre Ayew-a'n goal hnih khungin an siphurh a sut zo a, Angelo Ogbonna chuan an chakna goal khung zuiin rinkai ni lo zawkin hnehna an chang.

West Ham hian a kum zawnin League Cup quarterfinal an lut ta a, hetihlai hian Tottenham erawhin tun hnai kum thum chhung chu a sang pariat zingah an inhlangkai thei ta lo thung a ni. Spurs hian kum 2008 khan League Cup hi an chawi a, hemi hnauh nomawi lian tham an chawi leh tawh lo.

Bilic a hlim

Tun season chhungin Frank de Boer, Craig Shakespeare leh Ronald Koeman te chu Crystal Palace, Leicester leh Everton manager an nihna aṭangin ban an ni tawh a, Nilaini zan hian West Ham hi chak lo ni sela chuan Bilic pawh hi a hna chan thei dinhmunah a ding.

Hliam vanga an chhawr theih loh Mark Noble a rawn kir tawh a, kum 30 mi Noble hian khelmual chhungah hruaitu a nihna a lantir a, hun harsa an tawh laiin an naute a fuih phurin huaisen takin an bei let - an thawhhona ṭha chu hnehna an chan theihna chhan bulpui a ni.

West Ham manager Slaven Bilic chuan, "Chawlhlawk lai khan kan rilru a hnual hle, mahse Brighton nen kan inkhelh ṭum nena a danglamna chu beiseina kan nei kha a ni. Spurs lakah goal thum kan khung thei a, kan khelh ṭhat em avangin goal hnih kan chhuah kha chu kan theihnghilh thei ang," tiin a sawi.

Kane tel lo Spurs

Kartawp inkhela Liverpool 4-1 ngawta an sawp hnuah Mauricio Pochettino chuan Wembley Stadium an hman thiam tawh thu a sawi a, Hammers lak an chet dan en erawh chuan White Hart Lane nen an bel dan a la inthlau hle tih a chiang.

Reds an hneh ṭuma hliam tenau tuar Kane te loin an tlarhma ten duhthu an sam tawk lo a, midfielder pawimawh Christian Eriksen chu minute 81-naah lutir a nih chauh avangin danglamna a thlen hman tawh lo - an tlarhnung a buai changin hnunglam aṭanga uaptu Hugo Lloris aiawh zo an nei lo tih a hriat bawk.

Spurs manager Pochettino chuan, "Kan khingpuite khan hloh leh chuang tur nei loin min hmachhawn a, keini tan Real Madrid leh Liverpool nena inkhelh zawh hnua ṭan mar leh kha a awlsam lo a ni," tiin a sawi.

Tottenhman hian kartawpah Premier League khel turin Manchester United an lenchilh leh nghal dawn, Argentine manager Poch hian striker Kane chu United hmachhawn tura a inpeih dawn leh dawn loh a sawi lawk theih loh thu a sawi bawk.