Srikanth leh Sindhu an tlang

Indian badminton star Kidambi Srikanth leh P V Sindhu te chuan harsatna nei loin French Open Super Series-a an match hmasa berah hnehna an chang a, second roundan inhlangkai.

Kar hmasa lawka Denmark Open Super Series premier nomawi chawitu Srikanth chu Fabian Roth nen an inhmachhawn a, mahse a khingpui German tlangval Roth hi game hmasa berah 3-0 in a hnufual laiin a inhliam a, a khel chhunzawm thei lo.

World number 8 Srikanth hian Hong Kong star Wong Wing Ki Vincent a hmachhawn leh dawn, player pahnihte hi kar hmasa lawk khan Denmark-ah an inkhel tawh a, Srikanth hian straight game-in hnehna a chang.

Hmeichhe singles lamah champion thei tura rinkaite zinga mi Sindhu chuan Beatriz Corrales chu 21-19, 21-18 in a hneh. World Championship-a silver medal dawngtu Sindhu hian Japan nula Sayaka Takahashi a hmachhawn leh dawn a ni.

Mipa double lamah Satwiksairaj Rankireddy leh Chirag Shetty te chuan Bastian Kersaudy leh Julien Maio te ṭangdun lakah minute 30 chhungin 21-12, 21-14 in hnehnaa chang bawk.