Chanmari FC hnehtu Aizawl FC an sang zel

Aizawl FC-in K. Malsawmkima hnuaia insiamṭha mek Chanmari FC lakah I League club danglamna an lantir a, inkhel thunun chungin 1-0 in an chak.

Nimin tlai RG Stadium-a inkhelah hian Vairengte tlangval David Lalhlansanga'n a penalty hlawhchhuah chu goal-ah a chantir a, man of the match-ah thlan a ni bawk. Aizawl FC-in match riat aṭangin point 19 an hmu a, semifinal an hnaih ta hle.

AFC nge nge
Aizawl FC-in Chanmari FC an hneh hmasak ṭumin 4-0 in an hneh a, nimin tlai lamah pawh an ngam hle. I League club hian Under 18 player Lalthankima (Thathana) hmangin chance ṭha ṭum thum an hmu a, Ainawn Veng rawlthar hian goal-ah a chantir thei lo.

I League club-in inkhel an thunun a, amaherawhchu goal hmuh tur a awm mai lo. Standly Rozario hote an hmuhnawm a, an tlarhma erawh a hriam tawk lo.

Chanmari lamin chance ṭha insiam an harsat a, chutihrualin bet hlawm hlak an ni bik lo. CFC forward Lalhriatpuia'n chance a nei a, goal zawnah a pet lo.

Coach Mala leh a hoten first half-a goal an chhuah loh avangin an vannei a, hun tawp lamah midfielder K. Lalrinfela'n goal khung theihna tur chu a duh tui hret avangin Chanmari defender-ten an tibuai hman. Substitute Lalmalsawma pawhin a hun ṭha neih a hlah bawk.

AFC tan David
Aizawl FC tan tun hmain David Lalrinmuana a langsar ṭhin a, Zemabawk North tlangval hi tunah chuan Chawnpui FC tan a khel tawh. Tun ṭumah pawh AFC-in David-a an nei a, ani erawh Vairengte tlangval David Lalhlansanga a ni thung.

AFC academy chhuak David-a hian Chanmari defender Benjamin J. Lalrinliana lakah penalty a hlawh chhuak a, goal-ah a chantir nghal bawk.

David hi a vanneih ṭum ni se goal dang khung thei tur a ni a, a ball pet ṭha zetin crossbar a per. I League club tan R. Lalthanmawia pawhin crossbar a pet per a, goal-ah an vannei lo.

AFC-in goal khat chauh an khung avangin Chanmari FC-in beiseina an nei ve reng a, an siphurh pawh an sut teuh hle.

Chanmari forward Hriatpuia'n ball petna tur ṭha taka a insiam hnuah ṭha zetin pet mah se goal sirah a kal - tlu zawk se penalty a hlawh chhuak thei hial ang.

CFC hian freekick aṭangin siphurh sut theihna ṭum hnih an nei a, an hmang ṭangkai lo. Aizawl FC an ṭang tluan a, minute 90 chhung thlirin chak an phu hrim hrim bawk.

Semifinal sawi nan a la hma - AFC Coach
Aizawl FC-in MPL9 round 8-na lekah point 19 an hmu tawh a, point belh lo pawh ni se semifinal khelh theih dan a awm tawh hial ang.
I League club coach Standly Rozario erawh a la ṭawng fimkhur hle. AFC coach Standly chuan, "First half-a kan chance miss hnemzia thlir khan chak chu kan phu a, point thum kan hmu hi kan lawm. Point 19 hmu tawh mah ila, semifinal sawi nan a la hma. Chak zel a ṭul," tiin Vanglaini a hrilh.

Chanmari FC tan erawh semifinal khelh phak a harsa dawn a, knockout stage beiseina erawh a la thi lo. Coach K. Malsawmkima chuan, "Bul kan ṭan ṭha lo a, kan hlau deuh mah mah a ni. A tawpah kha chuan kan khel ṭha ve viau a, mahse point hmuh nan a tawk lo. Chak phu zawk an chak a, kan khelh leh hunah chuan point thum hmu zawk kan nih a ngai," tiin Vanglaini a hrilh.