World Cup khel lo tur N’Golo Kante

Chelsea midfielder N'Golo Kante chuan Qatar World Cup a khel thei dawn lo. Kante inhliam hi a khelh mekna Blues tan a pawi a, an ram France tan pawh channa lian tak a ni bawk - a hmun ruak hnawh khah a harsa mai thei.

Kum 31 mi Kante hi August 14-a Tottenham nen an inkhelh ṭumin a inhliam a, a malpui hliam avang hian a la inkhel leh lo. London club lamin thu an chhuah dan chuan, thla li vel a chawlh a ngai dawn hial.

Chelsea chuan thuchhuah siamin, "Kante leh club medical department lamin specialist an be rawn a, a chawlh chen tur hi a hriat theih," an ti. Blues manager Graham Potter pawhin an midfielder hi a chawlh rei a rin thu a lo sawi tawh bawk.

Kante-a teammate Reece James pawh World Cup khel lo thei dinhmunah a ding mek bawk a, ani pawh hi a inlan thei lo a nih chuan England tan channa lian a tling ang - an khelh mekna Chelsea tan pawh an hmun ruak a zau.

Premier League player langsar zingah Diogo Jota chu World Cup khel thei lo tur zinga mi a ni bawk. Liverpool forward hian Qatar a pan theih beisei mah se, tun hnai khan Jurgen Klopp chuan Jota hi a chawlh rei tur thu a sawi chiang.