Bethlehem hmaaah Electric Veng ‘THAR’

Honda MPL9-ah vawiin tlai dar 4:00 hian FC Bethlehem leh Electric Veng FC te RG Stadium-ah an inkhel dawn. EFC hian coach thar Lalremtluanga hnuaiah an khel dawn a, club pahnih hi table mawng lama an awm avangin inkhel tur hi a pawimawh takzet.

Relegation Battle
Electric Veng hian MPL9-ah vawi khat chauh hnehna an la chang a, an hneh awmchhun chu vawiin tlaia an khingpui tur FC Bethlehem hi an ni. Coach RT-a tan an hneh tawh hnu leh an elpui hneh hi a pawimawh ang.

Bethlehem hian EFC hneh lo mah se point nga an hmu tawh a, Electric Veng chungah an awm. Amaherawhchu, FCB leh EFC inthlauhna hi point khat chauh a ni a, coach Victor Lalbiakmawia hote tan chak ngei a ṭul bawk.

MPL-ah hian a hnuai bera awm an relegate a, pasarihnain playoff an khel a, playoff khelh ngai loa him nghal turin parukna china awm a ngai. Electric Veng leh Bethlehem te hian point thum ni loin point ruk an inchuhah a ngaih theih hial a ni.

Draw Vs Point 3
Team dinhmun thlir chuan point thum hmuh tuma an rawn chet chhuah ve ve a rinawm a, amaherawhchu chutiang chu an ni hauh lo. Electric Veng Lalremtluanga chuan, "Kan chak lo a nih chuan kan inthlauhna hi point li a ni dawn, chuvangin tlarhnung kan ngai pawimawh hmasa ang a, point hlawhchhuah hrim hrim a ngai," tiin chak loh a thian loh thu a sawi.

FC Bethlehem coach Victor Lalbiakmawia chuan, "Electric Veng hi kan hneh tawh lo a, team chhia an ni lo. Chutihrualin kan ṭha zawkah kan ngai a, point thum hmu turin chak ngei tumin kan khel dawn," tiin chak ngei a tum thu a sawi thung.

Electric Veng hian coach thar an neih miau avangin starting eleven pawh an siksawi a rinawm a, Bethlehem lamin an match hnuhnuhnung bera an 'game plan' hmang tho siin tlarhma tih chak hret an tum ang. FCB hian match hnuhnung berah Chhinga Veng an chelh a, tun inelnaa an clean sheet hmasak ber a ni.