Zaninah la chak lo pahnih!

Indian Super League chu zan thum zet inkhel loa an chawlh hnuah zanin dar 7:30 hian an khel leh tawh dawn a, NorthEast United chuan East Bengal an mikhual dawn.

Club pahnih hi tun season ISL-a point la nei lo ve ve an ni a, tun season-a league match hnih khel tling tawha la chak lo awmchhun an ni - point thum hmu hmasa zawk nih an tum ang.

NorthEast United-in season hmasaa beisei phak lo coach Khalid Jamil chu a contract an pawtsei lo a, Israeli coach Marco Balbul an lalut. Mahse, Maccabi Haifa coach hnuaiah pawh eng ruai an ang lo.

Highlander hian Mizo player, full back Joe Zoherliana, midfielder Emanuel Lalchhanchhuaha, forward R. Laldanmawia leh Rochharzela te an kawl.

Aizawl FC forward hlui Chhara'n minute 34 bak a la khel lo a, Emanuel-a'n match hnihah bul a ṭan ve ve a, Zohera a la inlan lo a, Danmawia pawh hliam vangin a la inlan lo - Sialhawk Express hian team training zawm tawh mah se Vanglaini thudawn danin a inlan theih kher a la rinawm chiah lo.

East Bengal-in defender Jerry Lalrinzuala leh Lalchungnunga an nei a, India coach hlui Stephen Constantine enkawlna hnuaiah hmun pawimawh an chang phak.