Fury-a'n Derek Chisora a hmachhawn dawn

Boxing khawvela thawm nei na tak Tyson Fury chuan WBC heavyweight title a kawl lai humhum tumin, December 3-ah Derek Chisora a hmachhawn dawn niin khawthlang media-te chuan an tarlang a, Tottenham Hotspur Stadium, London-ah an intawng dawn, tih thlengin an sawi.

The Gypsy King' hming lem an pek Fury hian Chisora hi ṭum hnih a lo hmachhawn tawh a, July 2011-a an intawn hmasak berah unanimous decision hmangin a hneh a, November 2014 khan round 10-naah a ngam nawn leh sak bawk.

A vawi thum nan boxer pahnih an intawng leh dawn niin a lang a, hriat tel atana ṭha erawh he thu buatsaih a nih thleng hian official taka puanzarna erawh a la awm lo.

Kum 34 mi Fury hian vawi 33 fight a hmachhawn tawhah tlawm a la nei lo a, vawi 32 hnehna changin, vawi 23 zet chu knockout hmangin a chak a, vawi khat a khingpui a inhnehtawkpui - April, 2022 khan Dillian Whyte chu round ruknaah technical knockout hmangin a hneh a, hemi hnuah hian ring chhung a la rap leh rih lo a ni.

A hmachhawn tura an sawi Chisora hi kum 38 mi a ni tawh a, vawi 45 fight a hmachhawn tawhah vawi 33 hnehna changin, vawi 23 knockout a nei - vawi 12 a tlawm a, July, 2022 khan a fight hnuhnung berah Kubrat Pulev chu split decision hmangin a hneh.

Pulev nena an inhmachhawn hmasakah split decision hmang thoin a tlawm a, an vawi hnih intawnnaah a hneh let thei - an vawi thum intawnnaah Fury tlawm a tum dawn.