Ṭhazuala'n bronze medal a la

Mizo shuttler beisei-awm H. Lalṭhazuala chuan All India National Sub-Junior Ranking Tournament-ah Mizo hming a timawi leh ta a, Chanmari West rawlthar hian Under-17 Boy's Doubles inelna huangah semifinal thlengin, bronze medal a vaw chhuak.

October, 11 - 18 chhunga neih inelnaah hian Ṭhazuala hi Under -17 inelna huangah a partner Ashrith Valishetty nen seeded parukna an ni phak a, quarterfinal-ah seeded pahnihnate vaw thlain semifinal an lut.

Semfinal-ah game hmuhnawm tak khel mah se deciding game-ah vanduai zawkah an ṭang a, final lut zo loin bronze medal-a lungawi an zir a ṭul.

Jwala Gutta Badminton Academy, Moinabad, Telangana-a neih inelnaah hian India ram hmun hrang hranga Under-15 leh Under -17 player ṭha 1093 lai an fuankhawm a, Ṭhazuala bakah hian Mizo naupang, phai lam academy ṭhaa awm mekte pawh eng emaw zah an tel a ni.

All India Ranking Tournament lianah hian Under-15 Boys' Singles-ah Vanlalpekhlua Sailo (Serchhip) in pre-quarterfinal a thleng a, U15 Boys' Doubles-ah Malsawmhlua leh Vanlalpekhlua Sailo (Serchhip ve ve) ten pre-quarterfinal an thleng bawk.

Under -15 Mixed Doubles huangah Malsawmhlua (Serchhip) leh a partner Pranjala ten pre-quarterfinal thleng bawkin, Under-17 Mixed Doubles-ah Lalnuntluanga leh Lalrempuii (Serchhip ve ve) te ṭangdun chuan pre-quarterfinal tho an thleng bawk a ni.

Inelnaa tel Mizo naupangte kaihruai a, enkawl turin Pullela Gopichand Badminton Academy a coach ni lai mek, Eddie Lalfelkima chu inelnaah hian a kal ve bawk.

Mizoram Badminton Association (MBA) chuan thuchhuah siamin, Mizo naupangte an hlawhtlinaa an lawmpui thu an sawi a, an hma hun atan duhsakna hlanin, tun dinhmun an thlen theih nana sum leh pai hmanga ṭanpuitu, TATA Trust thuneitute hnenah lawmthu an sawi bawk a ni.