Europa League Hmahruaitu nih ngei tum Arsenal
Premier League hmahruaitu Arsenal chuan zanin hian Europa League an khel dawn. Gunners hian group match tawp hmain an dinhmun tihchian an duh, chuvangin zanin dar 10:30-a PSV Eindhoven an mikhual hunah chak thei turin team an rem ang.
Ruahman dan hmasa chuan, tun ṭuma match an khelh tur hi September 15-a khelh daih tawh tur kha a ni. Mahse, Queen Elizabeth II thihna vangin a hunah an khel thei lo - Europa League khelh hun hi an sawn phah.
A hun pangngaia Europa League an khelh loh avang hian, league lama Arsenal leh Manchester City te inkhel tur chu sawn a ni leh bawk, an khelh hun tur erawh tihchian a la ni lo, kum tawp lamah an fixture a tawt hret dawn tihna a ni.
A pawimawh
Europa League-ah hian group hmahruaitu nih a pawimawh, a chhan chu last 16 luh nghal theihna a ni. Pahnihna tan chuan last 32 (playoff) khelh a ngai, hetah hian Champions League group stage aṭanga tlate nen an inel a ngai dawn.
A tawi zawnga sawi chuan, group hmahruaitu nih chuan season chawhnu lama match hautak pahnih khelh hah ve kher a ngai dawn lo, hahchawlhna hun an ngah bik dawn tihna a ni a, chuvangin tuna chet fuh a pawimawh.
Gunners hian match thum an khelh tawhah hnehna an chang vek, an hnuaia awm chu point sarih neitu PSV an ni. Mikel Arteta naute hi an chak a nih chuan an tlang dawn a, hmahruaitu ni chunga tlang turin an dinhmun a ṭha bawk ang.
Player siksawi
Mikel Arteta tan player neih ṭhat zawng zawng chhawr vek a rem lo ang, kartawpah Premier League an khel leh nghal dawn. Kar hmasa pawhin Europa Leage leh EPL an khel zawn a, harsa vak loa hneh theih tur Leeds United lakah an chak hram.
EPL ngaih pawimawh a ṭul rualin Europa League ngaihnep erawh a rem bik lo. Defender Takehiro Tomiyasu aiah Kieran Tierney chuan bul a ṭan leh a rinawm a, a laiah Rob Holding a awm thei bawk ang - tlarhnung player pahnihin hahchawlhna hun an nei thei dawn.
Gabriel Jesus chu chawl tura rinkai a ni, striker Eddie Nketiah a chet fuh ṭhin tho avangin buaina a awm lo ang. Keeper Aaron Ramsdale aiah Matt Turner a lut leh bawk ang, ani hian tun season Europa League a la khel vek a, match thumah goal khat chauh a chhuah.