Perez-a'n Haaland contract hriatpui lo

Goal khung thei bik striker Erling Haaland-a'n Manchester City tan season khatna a la hmang chauh tihin Real Madrid nen sawizawm tawk pawl an awm.

Pep Guardiola pawhin Haaland hian Real Madrid zawm theihna turin release clause a awm loh thu a sawi a, chutihrualin release clause hrim hrim erawh a awm niin a lang.

The Athletic-in a tarlan danin kum 2024 nipui aṭangin Haaland release clause hi a nung ṭan dawn a, Norwegian striker hi pound maktaduai 175.5 (€200million) in a lei chhuah theih dawn. Chutihrualin English club chuan City aṭangin an lei chhuak thei lo thung.

Real Madrid president Florentino Pérez chuan, "Erling Haaland tan release clause a awm maw? thudik tak sawi chuan ka hriatpui lo. Khawvel player ṭha ber ber kan kawl alawm.

"Mbappe chungchang hi sawi a ṭulna ka hre lo a, Real nena sawizawm thuthang hi a kham awm ta. Khawvela player ṭha pahnih Rodrygo leh Vincius te kan nei e," tiin Haaland bakah nipuia an lak theih tak loh Kylian Mbappe te a ngaihsak loh thu a sawi.

Perez hi football club president zingah chuan langsar ber tiha chhal ngam a ni a, kum 2009 khan nipui bazarah Cristiano Ronaldo, Kaka leh Karim Benzema te Santiago Bernabeu-ah a senglut a, player pathum hian Ballon d'Or an dawng vek tawh a ni.