NBA season thar an ṭan Champion lai Golden State an chak nghal

Basketball inelna lian leh ropui ber NBA 2022-23 season chu nimin zing aṭang khan an khel ṭan, regular season match hmasaah champion lai Golden State Warriors chuan Los Angeles Lakers 123-109 in an hneh a, inkhel a hmuhnawm nghal hle.

A bul ṭan ni aṭangin Stephen Curry leh LeBron James te an hmuhnawm leh nghal takzet a, season dang ang bawkin kuminah pawh anni pahnih hi mimal en hlawh an ni leh dawn, match hmasaah chuan Curry a chungnung leh phawt.

GSW boruak
Season ṭan hmain Golden State Warriors hian buaina an nei, training an neih laiin Draymond Green chuan a teammate Jordan Poole a hnek, coach Steve Kerr-a'n Warriors a enkawl china thil thleng duhawm lo ber a nih thu a sawi hial.

American player Green-a'n ngaihdam a dil zui a, a ngaihdam dilna hi an pawmsak. Kerr-a'n a player pahnih hi a inremtir leh thei, an match hmasa berah pawh an inlan dun nghal a, team tana player pawimawh an ni.

Kum 34 mi Curry-a'n point 34 neiin a thawhhlawk leh hle a, point 20 neitu Andrew Wiggins hi season hmasa ai khan an hmang ṭangkai zualin a rinawm, an inkhel thlir chuan team dang tana hmachhawn an chakawm lo khawp ang.

All Star vawi riat ngawt ni tawh Curry a la rintlak dawn a, tawnhriat nei ṭha Klay Thompson a dam ṭha bawk. Poole leh Green an la awm cheu bawk avangin, team ṭha leh inkhairual ber anga sawi theih an ni hial.

Lakers chak lo
LeBron James tan NBA season 20-na a ni a, point 31 zet nen bul ṭan mah se a team chakpui nan a tawk zo lo. James hi Anthony Davis nen an inkawp fuh leh dawn niin a lang, an match hmasa berah chak lo mah se tho chhuak leh nghal turin theihna an nei.

Kum 37 mi James hian season hmasa tawpah khan NBA huanga a point neih chu 37,062 a ni a, tunah point 31 a neih belh; point 37,093 a nei ta chiah. Basketball inelna sanga point nei hnem ber Kareem Abdul-Jabbar (38,387 points) khum turin kawng dik a zawh zel.

Inkhel dangah Jayson Tatum leh Jaylen Brown ten point 35 ve ve an nei a, nikuma team ṭha leh hmuhnawm ni bawk Boston Celtics chu 126-117 in Philadelphia 76ers lakah hnehna an chanpui a, bul an ṭan fuh leh hle.

Philadelphia tan James Harden-a'n point 35 a nei, season hmasa lama che ṭha tak Joel Embiid pawhin point 26 a nei nghal a, amaherawhchu anmahni aia che ṭha zawk Celtics lamin Tatum leh Jaylen Brown an neih miau avangin an team an chakpui zo lo.