Atletico Madrid chelhtu Radamel Falcao
Kum 36 ni tawh mah se Radamel Falcao-a'n inkhel boruak sangah rintlak a la ni reng tih a pholang a, Rayo Vallecano tan Atletico Madrid an draw-na goal a khung.
Thawhlehni zan khan Atletico Madrid-in Vallecano hi an mikhual a, team pahnih hi 1-1 in an inhnehtawk - Atletico hian tun season-ah league match hnih a zawna chak vawi khat chiah an la nei!
Atletico Madrid-in minute 20-naa Alvaro Morata goal khung chakpui mai an inbeisei a, mahse, hun pek belhah Falcao hian penalty hmangin si phurh a sut a, a team tan point khat a hlawh chhuak.
Thawhlehni zan inkhel dangah Sevilla leh Valencia te 1-1 thoin an inhnehtawk a, Getafe leh Athletic Bilbao inkhelah pawh chak zawk an awm lo.
Inkhel hmuhnawm
Metropolitano Stadium-a inkhelah Atletico-in goal khung turin an nghak rei lo - minute 20-na lekah mualneitu team tan Morata chuan striker class tih awm renga mawiin Antoine Griezmann ball siamsak ṭha zet chu goal-ah a lo chantir.
Goal dang lut loa chawlhlawk hman a nih hnuah Rayo-in second half-ah chance an nei a, mahse, Atletico aṭanga loan-a an hawh Sergio Camello chuan a chance neih a chhawr lo a, Falcao-a khung ngei tur nia lang Atletico keeper Ivo Grbic-a'n a lo dan hman pawh uiawm a tling.
Atletico tan pawh Griezmann chuan goal a khungah inngai mah se offside vangin pawm a ni lo a, Morata thlaktu Matheus Cunha pawhin chak nemnghehna remchang nei mah se Vallecano keeper Stole Dimitrievski chuan a lo dansak.
Cunha vannei lo mah se chance a hlah hian minute 80 a chuang tawh a, Atletico-in a zawnin league match li hnehna an chang mai dawn niin a lang tawh.
A hming Falcao
Mahse, Vallecano-in ngaihdan dang an nei. Minute 88-naa bench aṭanga luhtir Rayo forward Randy Nteka ball tauh chuan Jose Gimenez ban a fuh a, referee-in video assistant a rawn hnuah penalty spot a kawk.
Falcao a lo pen chhuak a, a vanglaia Atletico tan match 91-a goal 70 khungtu hian a club hlui lamah a khung a, Rayo tan point khat hlu tak a hlawh chhuak - amah vanga hlim taka lam ṭhin Atletico fan-ten ngui takin stadium an chhuahsan.
Champions League-a dinhmun derthawng taka ding mek Atletico hi league-ah pathumna an la ni mek a, mahse, nizana Real Betis inkhel result a zirin he thuziak i chhiar meuh chuan an dinhmun a danglam leh tawh ang.
Nizana inkhel zingah Real Madrid an tel a, result kan hre hman lo - Barcelona chuan zanin dar 12:30-ah Villarreal an lenchilh thung dawn.
Inkhel dang
La Liga inkhel boruak sangah Sevilla leh Valencia te 1-1 thoin an inhnehtawk - mikhual Valencia tan Edinson Cavani chuan minute rukna lekah goal a khung a, tun season match ngaa goal thum a khungna a ni. Mahse, he goal hi chakpui tura an inngaih laiin Erik Lamela chuan minute 85-naah si phurh a sut.
Hun tawp lamah 'drama' a thleng zui - Sevilla winger Papu Gomez chu hun pek belh minute 12-naah hnawhchhuah ni mah se VAR rawn hnuah sut a ni a, mahse, centre back Kike Salas chu Thierry Correia laka a foul avangin red card pek a ni a, penalty a chawi bawk.
Valencia tan Jose Gaya lo pen chhuak mah se Sevilla goalkeeper Bono tan dan harsa turin a pet lo a, 1-1 in an ṭin. Hetihlai hian Getafe leh Athletic Bilbao te chu 2-2 in an inhnehtawk bawk.
Bilbao hian Inaki Williams leh Raul Garcia hmangin vawi hnih ngawt hma hruai mah se Getafe-in Carles Alena leh Munir El Haddadi hmangin an sut leh ve ve - Thawhlehni zana La Liga inkhel pathumah chak an awm miah lo tihna a ni!