Jon Flanagan-a'n inkhelh a chawlhsan

Liverpool defender hlui Jon Flanagan chuan professional football a chawlhsan thu a puang a, kum 29 mi chauh la ni mah se a khup hliam dam hleithei lo avangin inkhelh hi a chawlhsan a ni.

Flanagan chuan, "Uluk taka ka ngaihtuah hnuah, harsa ti tak chungin inkhelh chawlhsan turin thutlukna ka siam a ni. Tun hnai thla 14 chhung khan ka khup hliam avanga ka dam leh ngei theih nan theihtawp ka chhuah a, mahse, ka hma hun rei zawk thlir a ṭul a, damdawi lam thiamte min thurawn avangin chawlh a ngai ta a ni," a ti.

Reds academy chhuak full back Flanagan hi a career ṭantir lamah beiseina a sang a, Brazilian full back ropui Cafu chuan, "Min thlaktu tur a ni - khawvela full back ṭha ber ni tura neih ngai chu a nei kim vek," tiin a fak hial.

'The Scouse Cafu' hminglem an pek zui Flanagan hian 2013-14 season khan Reds tan league match 23 zet a khel a, Brendan Rodgers hoa league-a pahnihna an nih ṭum hian a thawhhlawk hle.

Mahse, beiseina sang tak nena season thar a thlir laiin khup hliamin a tlak buak a, vawi hnih zai a tawh avangin thla 20 chhung inkhel loin a awm a, ngai a awh leh tawh lo - a inhliam hnuah hian Reds tan match riat chiah a khel zui.

England tana vawi khat inlan hman Flanagan hian Burnley leh Bolton Wanderers-ah te loan-in a khel hman a, Steven Gerrard enkawlna hnuaiah Rangers tan khelin, Belgian club Charleroi leh Danish club HB Koge pawh a zawm a, nipuiah khan Koge-a a contract hi titawpin, club dang a nei zui lo.

Flanagan chuan, "Footballer nih hi ka naupan lai duhthusam a ni a, ka mang ramte chu a takin ka chen a ni. Ka club ṭan em em Liverpool tana khelin, captain armband hial ka hreng a, ram tan meuh ka inlan bawk a, mi tam tak duhthusam ka puitlin avang khan ka hlim a ni.

"Tunah chuan football khawvela ka zinkawng dang chu ka zawh ṭan dawn a, ka hma hun chu nghakhlel takin ka thlir mek a ni," a ti a, footballer nun mangṭha mah se football mangṭha hlen a tum lo.