Netherlands hmaah Sri Lanka

2022 ICC Men's T20 World Cup-ah Sri Lanka-in bul ṭan ṭha lo mah se match hnihnaah an insiamṭha a, United Arab Emirates chu 79 runs-in an sawp. Vawiin chawhma dar 9:30 hian Netherlands leh Sri Lanka te an inkhel dawn a, a chak zawkin Super 12 an lut ang. Tlai dar 1:30-ah Namibia leh UAE te an inkhel zui ang a, Namibia hian hnehna an chang a nih chuan round sang zawkah an inhlangkai bawk ang.

Netherlands hian match hmasa pahnihah UAE leh Namibia te hneh mah se team ṭha bera ngaih Sri Lanka an la hmachhawn dawn avangin Super 12 thlen phak hi a la harsa hle. T20 cricket-ah hi chuan draw a awm ve thei lo a, chutihrualin ruahsur vang emaw chhan dang vang emaw chuan 'no result' chu a awm thei.

Netherlands tan Asia champion Lions hneh hi a harsa dawn a, 'no result' hi duhthusam a ni hial ang. Chutihrualin Sri Lanka pawh hi an chak lo a nih chuan tla nghal thei dinhmunah an ding. Namibia erawh Netherlands lakah tlawm mah se Sri Lanka hnehtu an ni a, UAE an hneh chuan Super 12-ah an inhlangkai dawn.