Palace chakna Wilfried Zaha

Wilfried Zaha chuan Crystal Palace innghahna lungphum pawimawh a nihna a lantir leh ta. Thawhlehni zan Premier League inkhelah Palace hian Zaha goal hmangin Wolverhampton Wanderers chu 2-1 in an hneh.

Inkhel dangah Brighton & Hove Albion leh Nottingham Forest te chu 0-0 in an inhnehtawk a, a mawng lama tal buai lai Forest tan point khat chauh hmuh belh pawh hi chanchin ṭha a ni ang - inhamtan hram tum tan chuan point hmuh hrim hrim a ngai.

Palace an chak
Mikhual Wolves an khel ṭha, an phu ang ngeiin Adama Traore chuan minute 31-naah goal hmahruai a tauh lut, chawlhlawk hmain goal an neih belh teuh hle. Ruben Neves-a'n remchang nei mah se goal ban a tihper hlauh.

Second half erawh Palace lam chan a ni. Inkhel an ṭan leh aṭanga second 63 hnu lekah Eberechi Eze hmangin si phurh an sut a, minute 70-nah Zaha chuan Odsonne Edouard khungin Selhurst Park-ah point thum an hlawh chhuak.

Zaha chuan, "Premier League hi chu a nuamin a ngaihnawm ṭhin. First half-ah te khan khel ṭha pangngai viau mah ila si phur zawk kan ni, goal kan chhuah hnua kan beih let dan erawh kha chu ropui tak a ni," tiin a sawi.

Vieira enkawl
Arsenal captain hlui Patrick Vieira enkawl Crystal Palace hian Premier League match 10 aṭanga point 13 hmuin table-ah 10-na dinhmun an luah, an chunga awm Brentford leh Liverpool nen an point a inzat - Reds hian match khatin an khel tlem thung.

Vieira hi media lamin an sawi vul chuk lo a ni mai thei, a hna thawh erawh sawi nep theih a ni lo. Palace hi team nghet pangngai takah a siam thei a, an boruak a fuh chho zel a nih phei chuan club lian tana hmachhawn chakawm lo zinga mi an ni thei dawn a ni.

Wolves erawh an buai chhunzawm, point kua chauh an la hmuh avangin table mawng lamah an talbuai - tla thei china awm Southampton aiin point khat chauhin an sang, season tharah EPL khelh zui duh tan chuan thawh harh a hun ta.

Inhnehtawk
Graham Potter thlaktu Roberto de Zerbi-a'n Brighton a la chak pui thei lo, an hneh ngei tura ngaih Nottingham Forest lakah goal an khung theih loh avangin point khatah an lungawi a ṭul.

Potter chhuah hnuah Brighton hian league match li an khel tawh a, point hnih chiah an hlawh chhuak, season bul an ṭan fuh avangin pasarihna erawh an la ni tho, tun ang zela an chet erawh chuan a hnuai lamah an tla thla ang.

Tun season-a vawi khat chauh la chak Forest tan erawh point hlu tak a ni thung, nipui bazarah player lei nasa viau mah se result an nei ṭha lo. Inrinni zanah Liverpool an mikhual zui leh nghal dawn, Forest tan Manchester City hnehtu Reds laka point hlawhchhuah hi a harsa dawn.