Kanjurahan Stadium sa ṭha dawn

Mi 132 zetin nunna an channa, Kanjurahan Stadium-a chhiatna rapthlak avangin Indonesia sorkar chuan an khelmual hi tichhiain, a bul aṭanga sak ṭhat leh vek a nih tur thu an sawi.

October 1 khan Malang, East Java-a Arema FC leh Persebaya Surabaya inkhelah buaina a chhuak a, a tirah mi 174-in nunna an chan thu sawi a ni. Mahse, uluk taka ennawn leh a nih hnuah mi 132 vel nia sawi a ni leh a, mi 96-in hliam serious tak neiin, mi 484 velin hliam tenau an nei bawk.

He thil thleng avang hian Indonesia president Joko Widodo leh FIFA president Gianni Infantino te chu Jakarta khawpuiah Thawhlehni khan an inhmu a, FIFA standard-a stadium sak ṭhat a nih tur thu hi puan zui a ni.

Stadium-a chhiatna rap-thlak thlen dan chhui tura din The Joint Independent Fact Finding Team (TGIPF) chuan, kar hmasa khan Indonesia president Joko Widodo hnenah an thil hmuhchhuahte an theh lut a, league huaihawttute an fimkhur tawk loh thu an thlen.