FIFA U17 World Cup ; Zaninah champion a hriat dawn ta

FIFA Under 17 World Cup final chu zanin dar 8:00-ah khelh a ni dawn ta a, England leh Spain-in khawvela rawlthar football thiam ber nih an inchuh dawn - Kolkata khawpuia Salt Lake Stadium-ah an inkhel dawn.

He hmunah vek hian tlai dar 5:00-ah Brazil leh Mali chuan pathumna dinhmun an inchuh bawk ang.

UEFA European Under-17 Championship 2017 final-ah England leh Spain hi an intawng tawh a, hun pangngaiah goal hnih ve ve khunga an inhnehtawk hnuin penalty-ah Spain an chak. Euro U17 final rematch kan hmu dawn a, England tan tun hi phuba lakna remchang chu a ni.

A ngai tein
England coach Steve Cooper chuan, "Awmze neia khelh kan tum dawn a, ball chan tam a, ball kan hloh apianga nei let tura theihtawp chhuah kan tum ang. Chu chu ruahmanna kan siam dan chu a ni a, kan khelh dan phung thlak kan tum lo. Tupawh kan hmaah ding se huaisen takin kan bei dawn a, anni aia ṭha zawk kan ni zel thei ang. Chumi atan chuan rim takin kan thawk dawn a ni," a ti a, Spain a hlau lo.

England tan quarterfinal leh semifinal-a a zawna hattrick siam thei Rhian Brewster chu innghahna tur a ni leh dawn a, Liverpool rawlthar duhawm hi ven uluk ngai tur a ni. Hetihrual hian Phil Foden thiamna sawi hmaih a thiang lo a, Pep Guardiola-a'n, "Ani ang rawlthar thiam ka hmuh lohna a rei ta," tia a fak Manchester City rawlthar hi hmuhnawm khawpin a khel thei.

Thawnthu hlui
UEFA Euro U17 Cham­pion­ship final-ah ram pahnih hi vawi thum an lo intawng tawh. An intawn hmasak ber ṭum kum 2007-ah Spain an chak. Kum thum liam hnuah Young Lions-in phuba an la a, Spain hnehin Europe champion an ni. Mahse, kumin final-ah vawi hnih ngawt goal khung hmasa chungin England an tawlhthlu a, Spain-in an si phurh an sut zawh hnuah penalty hmangin an chak.

Euro U17 final-a ram pahnih intawn hi May thla chauh kha a la ni a, England hliam a la dam lo a, rilru na thawidamin a la awm lo. Kha squad aṭang khan team pahnihah inthlak danglam a tam lo - England tana Euro U17 final-a penalty pet goal lotu zinga mi Rhian Brewster chu England tan player pawi­mawh a la ni reng a, tun hi a tihsual thaibona hun chu a ni.

Ngaihven hlawh Ruiz
England-in Rhian Brewster an neih an inchhuanpui a nih chuan Spain-in Abel Ruiz an nei ve tho. Barcelona rawlthar duhawm hian Euro U17 nomawi an chawi ṭum khan goal li a khung a, tun tournament-ah pawh ngaihven hlawh ber pawl niin goal ruk a khung tling leh der tawh -England tlarhnung tan a hming chhinchhiah a fuh ang.

Young Lions tan Cesar Gelabert theihnghilh a thiang lo bawk. 'Pass master' tia hminglem an pek Real Madrid rawlthar hian semifinal-a Mali an hnehna inkhelah pawh assist vawi hnih a nei a, football journalist lar Andrew Gibney chuan, "England tlarhnung ṭhiat tura theihna zawng zawng a nei vek a ni," tiin a fak hial - zaninah a hriat dawn e.

Final Zinkawng
England
Group Stage
Chile 0 - 4 England
ENG: Callum Hudson-Odoi 5'; Jadon Sancho 51', 60'; Angel Gomes 81'
England 3 - 2 Mexico
ENG: Rhian Brewster 39'; Philip Foden 48'; Jadon Sancho 55' (P)
MEX: Diego Lainez 65', 72'
England 4 - 0 Iraq
ENG: Angel Gomes 11'; Emile Smith-Rowe 57'; Danny Loader 59', 71'
Round of 16
England 0 - 0 Japan
*Penalty-ah 5-3 in England an chak
Quarterfinal
USA 1 - 4 England
USA: Josh Sargent 72'
ENG: Rhian Brewster 11', 14', 90+6' (P); Morgan Gibbs-White Goal 64'
Semifinal
Brazil 1 - 3 England
BRA: Wesley David 21'
ENG: Rhian Brewster 10', 39', 77'
Spain
Group Stage
Brazil 2–1 Spain
BRA: Lincoln 25'; Paulinho 45+1'
SPA: Wesley David 5' (OG)
Spain 4 - 0 Niger
SPA: Abel Ruiz 21', 41'; César Gelabert 45+1'; Sergio Gómez 82'
Spain 2 - 0 North Korea
SPA: Mohamed Moukhliss 4'
NOR: César Gelabert 71'
Round of 16
France 1 - 2 Spain
FRA: Lenny Pintor 34'
SPA: Juan Miranda 44'; Abel Ruiz 90' (P)
Quarterfinal
Spain 3 - 1 Iran
SPA: Abel Ruiz 13'; Sergio Gómez 60'; Ferrán Torres 67'
IRA: Saeid Karimi 69'
Semifinal
Mali 1 - 3 Spain
MAL: Lassana N'Diaye 74'
SPA: Abel Ruiz 19' (P), 43'; Ferrán Torres 71'