AFC C Licence Coaching Course zo fel

Asian Football Confederation C Licence Coaching Course chu October 26 khan Rajiv Gandhi Stadium, Aizawlah khar fel a ni.

AFC C Licence Course hi course instructor Thomas Joseph hnuaiah kalpui a ni a, October 14-26 chhunga neih a ni. Coach 22-ten he course hi an kal tluan a, football coach hi Mizoram, Manipur, Meghalaya, Assam leh Delhi aṭangin an kal khawm. AFC lamin result hi a remchang hmasaah an tichhuak ang.

Mizoramin AFC C Licence Course a thlen vawi hnihna a ni a, zing dar 6:30 atanga tlai dar 5:30 vel thleng theory leh practical class an nei ṭhin a ni.

October 26 tlaia kharna inkhawm neihah MFA honorary secretary Lalnghinglova Hmar chuan AIFF duhsakna dawnga coaching course Mizorama nghah a ni chu a lawmthu a sawi a, India rama footballer ṭha chher chhuak zel turin coach ṭha neih belh a ṭul thu sawiin, "AFC A Licence nei pakhat chiah kan la nei chungin heti zat hi India aiawh thei player kan chher chhuak thei a, ṭhenawm state dangte anga coach ṭha kan neih ngah hunah phei chuan player ṭha tam zawk kan chher chhuak thei ngei ang," a ti a, MFA-in coaching course tam zawk thlen dilna AIFF lama an dil mek thu a sawi.

Course Instructor Thomas Joseph chuan MFA inpekna a fak a, course hlawhtling tak an kalpui nia a hriat thu leh coach ṭha tak tak an chhuah ngei a beisei thu a sawi.