Semi final luh tum Ramhlun North
Mizoram Premier League Season 6-ah Ramhlun North-in nimin tlai khan Chanmari West 3-0 in an hneh a, semifinal an beisei ngam leh ta - an phûr hle.
Samson Ramengmawia hote hian point 14 an hmu a, panganaah ana wm mek a, nizana Mizoram Police leh Chanmari FC inkhel result a zirin an dinhmun hi la danglam thei a ni.
Coach thar fiahna
Chanmari West-in coach H. Lalnunzira hnuaia an match hmasa berah Chanmari FC hneh mah se semifinal khel tura an elpui Ramhlun North lakah erawh point hmuh phuin an khel chhuak lo.
Ramhlun North-in minute 13-na lekah Lalliansanga (Notea) leh Harry Delona Harris te thawhrah sengin Lalmuansanga hmangin goal hmahruai an khung a, Notea'n minute 35-naah goal hnihna a khung leh bawk avangin Samson-a hote tan point thum hmu turin harsatna a awm lo.
Second half-ah Ramhlun North bawkin goal chance an ngah a, Liberian midfielder Harry-a'n keeper Lalmalsawma chauh a hmachhawn hnuah ti goal lo mah se minute 84-naah goal mawi danglam bik a khung.
Chanmari West-in hun tawp lamah inkhel thunun nawr let ngial mah se an ṭang tlai hret a, uiawm takin an hlah nual a, chak phu zawk Ramhlun North-in hnehna an chang.