Lewis Hamilton a inngaitlawm

Pathianni zan dar 12:30-ah Formula 1 Mexican Grand Prix tlan a ni dawn a, Lewis Hamilton chu a chesual hle a nih loh chuan a champion tawh dawn. Mercedes driver hian a vawi li nan champion pawh ni se a naupan laia a mi ngaihsan Ayrton Senna a tluk dawn tihna a nih loh thu a sawi.

Formula 1-ah hian driver pali chiahin world champion nomawi vawi li an chawi tling thei a, Britain driver hi a champion thei a nih chuan pangana a ni ang.

Kum 1994 khan Brazilian driver Ayrton Senna chu rin loh tak maiin a thi a, world champion vawi thum ni thei Senna hi Hamilton-a mi ngaihsan leh entawn a ni a, intlansiaka hnehna chan tam lam bakah podium lawn hnem leh pole position chan hnem lamah Hamilton hian a idol hi khum vek tawh mah se Senna hi amah aia a la dahsan zawk reng thu a sawi.

Mercedes driver Hamilton chuan, "Ayrton kha a nun sei deuh sela chuan sulhnu ropui a hnutchhiah ngeiin ka ring, ani leh kei hi ka inkhaikhin hran lo a, a kianga ka hming a chuang ve ringawt pawh hi ka inchhuang hle zawk a ni," tiin a sawi.

Formula 1 vawi nga champion tawh Michael Schumacher chu intlansiaka hnehna chang hnem ber a la ni zel a, German driver hian vawi 91 hnehna changin Hamilton hian vawi 29 zetin a la phak lo.