BVT an invawrh, Dinthar an tâng

Mizoram Super League champion hmasa ber Dinthar FC-in match thum a zawna an khingpui an hneh loh avangin tla thei dinhmunah an ding. Ningani zan inkhelah coach lailawk Benjamin Lalhriatpuia hnuaia khel Bethlehem Vengthlang FC-in table mawnghphaha awm Dinthar FC 3-2 in an hneh.

BVT hian an veng pa Benja kaihhruaina hnuaia point thum an hlawh chhuah avangin point 15 hmuin pathumnaah an invawrh a, nizana Mizoram Police leh Chanmari FC inkhelah eng result pawh thleng se round 11 zawhah chuan semifinal khel thei chinah an awm ang.

Beiseina nen

Dinthar FC-in beiseina nen bul an ṭan a, Chawngthansanga kalsan Bethlehem Vengthlang an talbuai hle. Inkhel thununtu Maimawms-in Jackson Victor-a tauh luh hmangin minute 24-naah hma an hruai a, BVT ṭantute an mangang hman.

Maimawms-in inkhel an thu­nun chhunzawm thei lo a, an tlarhnungin hmun hima ball an petchhuah theih loh an tuar bawk. Minute 44-naah Laldinliana Varte chuan box pawn aṭangin BVT si phurh sutna goal a khung a, phûrna thar an neih phah bawk.

Chak duh zawk

Second half-ah BVT an tha tho zawk a, captain Lalrammawia thawhrimna chu team tiphurtu pakhat a ni.

Minute 67-naah Rammawia ball pek fing tak chu PC Zosangliana'n la fuh tawk lo mah se Dinthar defender an chetsual avangin New Builum tlangval Zosanga'n awlsam takin hmahruaina a pet goal.

Dinthar FC-in point an ma­mawh avangin attacking football an khel chhunzawm a, an nawr nasat luatah BVT-in an vuaklet phah. Rammawia'n chak taka ball a khalh chhuah pui hnuah PC Lalṭhazuala'n nen wall pass neiin BVT captain hian goal thumna a khung.

Maimawms coach Vanlal­rova'n si phurh sut tumin attac­king player a dah belh a, sub­stitute Lalmalsawmtluanga chuan minute 88-naah R. Lal­than­tluanga cross ṭha takin a tauh lut. Republic Veng tlangval Malsawmtluanga'n MPL-a khelh­na hmasa berah goal khung nghal mah se Dinthar point hlawh­chhuah pui nan a la tawk lo.

Hmabak chu...

Dinthar FC tan relegate pum­pelh turin match thum khelh hmabak la awma vawi khat chak a tawk tawh lo. MPL champion hmasa ber hian Aizawl FC an hmachhawn dawn a, hemi zawh hian Mizoram Police leh Chanmari FC te an khelhpui leh dawn.

Bethlehem Vengthlang FC hmaah Chanmari FC, Chhinga Veng leh Chanmari West te an la awm a, semifinal kalkawng hi a la bumboh hle.

Coach lailawk Benja kaihhruaina hnuaiah knockout stage lut tura an elpui Chanmari FC an hneh thei a nih chuan BVT hian coach dang melh loin season liam taa MPL Under 18 champion puitu hian coach hna hi a ken tlang ngei a rinawm.