Old Trafford-ah Spurs fiahna

Tun hma chuan Manchester United tan Tottenham Hotspur hi ngaimawh tham an ni ngai lo a, Spurs tan lah United hi elphak rual loh an ni. Mauricio Pochettino kaihhruaina hnuaiah North London club-in hma an sawn nasa a, vawiin tlai dar 5:00-a an inkhelh hunah pawh Poch-a naute hi chak lo zawk tura dah ngawt theih an ni tawh bik lo.

Vawiin tlaia an inkhelhna tur hi Old Trafford a ni a, mipui 75,643 lenna khelmual hi Tottenham tan hmun ralṭi leh ṭihbaiawm a ni. Premier League tia hming vuah a nih hnu, kum 1992-93 hnu lamah vawi 25 an lenluhah ṭum 20 an chak lo - an tlawh hnuhnung ber chu nikum December thla kha niin Henrikh Mkhitaryan-a goal hmangin United 1-0 in an chak.

Pocha-a'n striker rinrawl leh thiampuipa ni bawk Harry Kane chu malpui hliam vangin an chhawr ngam a beisei loh thu a sawi a, United lam pawhin Juventus aṭanga manto taka an lakluh midfielder Paul Pogba an chan mek bawk - club pahnih hian an player pawimawh tak an chhawr thei dawn lo ve ve a ni.

Kane tel loin

Argentine manager Mau­ricio Pochettino-a'n team a din chho mek a, a elpui club dang angin player lei nan sum hmang hnem thei rih lo mah se a neihsa a hmang thiam a, kheldan phung mumal tak a neihtir avangin team nghelnghet ber pakhat an ni mek.

Striker Harry Kane-a'n season hmasa khan Premier League-ah goal 29 khungin Golden Boot a dawng a, England international striker hian tun season-ah pawh inelna hrang hrangah goal 12 a khung leh der tawh a, an innghahna a ni.

Amaherawhchu, striker rinrawl Kane hi Liverpool an hneh ṭumin hun tawp dawnah a malpui hliam vangin lakchhuah a ni a, League Cup-a West Ham an hneh loh ṭumin a inlan thei lo zui bawk - vawiin tlaia a inlan thei lo tur hi United tan thawk huaina tham a tling ang.

Spurs boss Mauricio Po­chettino chuan, "Doctor leh medical staff-te chuan chhawr lui rih lo turin min ti a ni. A hliam hi nasa tak ni lo mah se kan dim rih a ngai, hliam tenau hi tih punlun a hlauhawm a ni," a ti. Season hmasa khan Kane hi a ke rek na vangin ṭum hnih a chawlh a ngai tawh bawk a ni.

Spurs hi hliam vangin buai deuh mah se tun hnaiah an defender-te an dam ṭan, season hmasa tawp lam aṭanga an chhawr theih loh Danny Rose a inpeih tawh a, tun season-a hmasawn tak Danny Rose pawhin Hammers a hmachawn thei tawh bawk.

Tottenham hian Champions League-ah Real Madrid an inhnehtawk pui hnuah Liverpool an sawp thei a, League Cup-ah erawh an goal hnih neih sa an humhim zo lo. Pochettino-a'n a zawna match hnih hautak tak khelh hnuah minute 90 chhung rilru pek a harsat thu a sawi a, vawiin tlai hian a striker ṭha ber tel loin point lama an nihrual mek United lakah fiahna hautak a hmachhawn dawn a ni.

Bus park

Jose Mourinho hian engtik lai mahin chak loh a duh ngai lo, an chak dawn loh ai chuan player tam zawk goal ventir a hreh lo. United hian Liverpool an tlawh ṭumin tlarhnungah 'Bus an park' a, goal chhuah loin an him hram.

Portuguese ma­nager hian Reds laka point khat an hlawh chhuah hnuah goal venhim

ṭhat chu sual a nih loh thu a sawi a, player hliam neih hnem chu chak loh chhuanlama hman chi a nih loh thu sawi bawkin a club hlui Chelsea a kâp zui bawk.

An tlarhnung a phui bakah goal an khung theih avangin United manager a ṭawng pawr a, mahse a pawr vanglai takin Huddersfield lakah 2-1 in an tlawm. Hliam vangin midfielder Paul Pogba, Michael Carrick leh Marouane Fellaini te an la chhawr theih a beiseiawm lo a, defender rinrawl Eric Bailly awm loh laiin kaithar team lakah an tlarhnung a pawp bawk.

Mourinho-a'n hmatawng nei ṭha Spurs lakah goal venhim tumin a naute a kheklhtir leh dawn nge ni a, a striker palian Romelu Lukaku chakna hmangin an mikhual tlarhnung a nawr dawn tih chu hriat chakawm tak a ni - a chak zawk tan point thum hmuh a ni satliah lo a, elpui team point chhuhsak theihna hun ṭha a ni ang.

Manchester United goal­keeper David De Gea-a'n season kal laiah clean sheets vawi sarih nei tawhin record nei ṭha ber a ni a, amah hnaih bertu chu Spurs captain Hugo Lloris a ni. United hian goal ven an thiam tih chu a chiang a, match 11 khelh aṭanga goal 11 khung thei Lukaku an neih bawk avangin an mikhual tur hi an huphurh lo ang.