Spanish Cup ; Ronaldo tel loin Real an chak

European champion Real Madrid-in Copa del Rey fourth round match khel turin third division club Fuenlabrada an lenchilh a, Cristiano Ronaldo tel lohna inkhel boruak a sang hle - penalty vawi hnih hmuh tur a awm a, red card vawi hnih phawrh a ni bawk. Real-in 2-0 in hnehna an chang.

Real goal hnih khung hi penalty

aṭanga lut ve ve a ni a, Marco Asensio leh Lucas Vazquez ten an pet goal. Fuenlabrada defender Paco Candela chu yellow card vawi hnih a hmuh avangin minute 79-naah hnawhchhuah a ni a, Real defend Vallejo chu minute 89-naah hnawhchhuah a ni ve bawk - inkhel boruak a sang tih hai rual a ni lo.

B team?

Real Madrid boss Zinedine Zidane-a'n an league match hnuhnung bera 3-0 a. Eibar an hnehna inkhel aṭangin player paruk a siksawi a, Cristiano Ronaldo, Sergio Ramos leh Luka Modric te chawlh hahdamtir niin an player langsar tel loin Real-in eng ruai an ang lo - goal khung turin second half leh penalty an nghah thlen a ngai.

Minute 63-naah Real hian penalty an hlawh chhuak a, Fuenlabrada defender Fran Garcia chuan kum 18 mi Achraf Hakimi a tih tluk avangin penalty hi a chawi. Penalty pet turin Asensio a lo pen chhuak a, goal-a chantir turin harsatna a nei lo - Real an lawm a, referee thutluknaah Fuenlabrada erawh an lungawi lo. Replay aṭanga a lan danin Hakimi hi penalty box pawn hretah tih tluk a ni a, Real-in referee chetsual an vanneih pui.

Boruak sang

Real-in penalty an chhuih luh

aṭangin minute 16 a liam a, penalty bawk an hlawh chhuak. Paco Candela chuan Theo Hernandez a ti tlu a, substitute bench aṭanga a rawn tlan luh aṭanga minute sarih chhunga a yellow card pahnihna hmuin hnawhchhuah a ni - penalty a chawi zui bawk. Penalty pet turin Lucas Vazquez a rawn pen chhuak a, Real chak nemnghehna ni turin goal-ah a chantir.

Fuenlabrada -in Real lakah penalty pahnih an chawi a, player pakhat hnawhchhuah a ni bawk - Segunda B club tan Spanish champion laka comeback lantir turin beisei a bo tawh. Hetichung hian player langsar tel loa khel Real player-te tawnhriat neih tlemna a lang chhunzawm a, Spain Under-21 centre back Jesus Vallejo chu Real tana a match hmasa berah direct red card hmanga hnawhchhuah a ni.

Lawm kim lo Zidane

Real Madrid-in hnehna an chang a, Zidane-a lawm erawh a kim lo - an khingpui hi Spanish third division club an ni miau a, French manager lawm kim lo hi a awm lo hran lo. Zidane chuan, "Red card avang khan ka lawm lo a, player hnawhchhuah an nih chuan lawm a harsa bawk. Mahse, Vallejo kha a

ṭhatna ka thlir sak a, game ṭha tak a khelh avangin hlim taka awm ka tum a ni," a ti.

Player leh manager a nih hnu pawha Spanish Cup nomawi la chawi lo Zidane chuan, "Ka lawmna chu ka naute an dawh thei em em kha a ni. Goal khung loh hnuah pawh huaisen takin an bei a, goal hnih khungin kan lamah goal a lut lo. Kha kha kan game aṭanga kan hawn tur pawimawh ber lai chu a ni a, kan result avang khan kan lawm vek a ni," tiin a sawi.

Hmabak chu

Real Madrid hian Pathianni zan dar 8:45-ah La Liga match an khel lehnghal dawn a, Girona chu khualmualah an lenchilh ang. La Liga champion-in beisei angin season an ṭan lo a, match kua an khelhah vawi ruk chiah an la chak - champion nawn an tum chuan league match li a zawna an chak tawh hi chhawm nun a ṭul dawn.

Hetihlai hian hmahruaitu Barcelona chuan zanin dar 12:15-ah Athletic Bilbao an lenchilh dawn bawk a, Barca coach Ernesto Valverde-a'n 2013-17 chhung a lo enkawl tawh club a vawi khat nan a tlawh dawn tihna a ni. Atletico Madrid chuan zanin dar 10:00-ah Villarreal an mikhual bawk ang.

La Liga - Fixtures
Zanin Inkhel Tur
Deportivo Alaves 4:30 PM Valencia
Atletico Madrid 10:00 PM Villarreal
Athletic Club 12:15 AM Barcelona
Sevilla 2:00 AM Leganes
October 29, Pathianni
Getafe 4:30 PM Real Sociedad
Girona 8:45 PM Real Madrid
Eibar 11:00 PM Levante
Malaga 1:15 AM Celta de Vigo
October 30, Thawhtan Zan
Espanyol 1:30 AM Real Betis
Las Palmas 1:30 AM Deportivo La Coruna