Hingis a chawl dawn

Hmeihchhe tennis singles leh double world number 1 hlui Martina Hingis chuan tuna WTA Finals khelh mek chu an zawh hunah tennis a chawlhsan tur thu a sawi chhuak.

Kum 37 mi Hingis hian 2003 khan a ke rek na vangin a inkhelh theih tawh loh tur thu a sawi tawh a, khatih hunlai khan kum 22 mi chauh a la nih avangin tennis ngainatu ten an ui hle. Kum 2007 khan Hingis hi beisei loh tak maiin court chhungah a inlan leh thei a, singles aiin double lamah a hun a hmang tam zui ta zawk a ni.

Swiss star hian singles-ah Grand Slam nomawi vawi nga a chawi hman a, major title a lak hmasak ber ṭum chuan kum 15 mi chauh la niin champion thei naupang ber a ni a, hliam vangin buai lo se la chuan player ropui ber berte zinga mi ni phak tur a ni - a kum tam hnuah pawh doubles leh mixed doubles lamah a ropuina a nep phah chuang lo.

Tun season-a Wimbledon leh US Open mixed doubles title latu Hingis chuan, "A chung bera awm chung ngeia chawlh hi duhthusam a ni a, chutiang chuan ka hun tawp pawh hman ka duh. Inelna kan neih zawh hi chuan ka tan chawlh a hun ang, ka rawn kir leh ang em tih erawh ka la ngaihtuah chhin lo," tiin a sawi.

International Tennis Hall of Fame-a seng luh tawh Hingis hi a doubles partner Chan Yung-jan nen WTA Finls-ah an inlan mek a, nizan khan quarterfinal khelin he thu buatsaih lai hian an result kan hre hman lo.