Man United an chak; Ronaldo a lungawi lo?

Erik ten Hag hnuaia Man-chester United game hmuh-nawm bera chhal ngam chu Nilaini zan khan hmuhtirin kan awm a, Red Devils hian an mikhual Tottenham Hotspur chu nuamsa takin 2-0 in an hneh.

United tan Fred leh Bruno Fernandes ten goal khat ve ve an khung a, Red Devils vanneih zan ni se hei aia tam zawka chak thei an ni - Spurs keeper Hugo Lloris chet ṭhat zan an tawng tlat.

Old Trafford-a United chhung-kuain chak an lawm laiin hlim ve thei lo pakhat a awm a, a hming chu Cristiano Ronaldo a ni - inkhel pawimawhah Portuguese forward hian bench a luah tluan a, inkhelh zawh hmain stadium a chhuahsan!

United boss Ten Hag chuan, "Ronaldo chet dan ka ngaihtuah lo a, hei chu naktuk lamah chinfel a ni ang. Kei chuan team ka ngaihtuah a, player 11-te khan an khel ṭha em em vek a ni," a ti.

A fuh cher cher!
United-in an league match hnuhnung berah goal an khung lo a, Newcastle United nen 0-0 in an inhnehtawk - Europa League-a a player neih ṭhat hmangtu Ten Hag-a'n sawisel a hlawh a, player chawlh hahdamtir nachang a hre lo chu an dem.

Old Trafford-ah erawh thawn-thu thlak danglamin a awm a, champion thei tura chhiar zinga mi Tottenham Hotspur chu Premier League tikimtu club satliah ang maiin an lang a, kawng tinrengah United an chungnung.

Red Devils hian first half-ah goal khung lo mah se, "An chak ang em?" tih ai chuan, "Engtikah tak khung ang maw?" tih chu zawhna zawk a ni a, a chhanna hmasa petu chu mi vannei Fred a ni.

Minute 47-naa Brazilin midfielder shot chu Ben Davies chuan lo dang perin Lloris a che hman lo - United-in an duhtawk mai lo. Fred-a ball petin Eric Dier a per hnuah Bruno ke bulah a tla a, Portuguese midfielder hian an goal hnihna ni turin a khung.

United an ṭha
Premier League-ah Casemiro a tlangnel ṭan tih a lang a, Fred nena an inkawp chu hmuhnawm an tling - Bruno Fernandes lam hmaih a thiang lo a, United-in sang tak thlen an tum chuan a chet ṭhat zel a pawimawh ang.

United hian vawi 28 ngawt shot neiin, heng zinga 10 chu target-ah a kal thei a, Lloris-a'n save ropui tak tak a nei nual a, Marcus Rashford shot vawi thum ngawt a dan te, Bruno leh Diogo Dalot chance duhawm a dante chu pui tak a ni.

Manchester khaw club tan Antony chuan post a pet per a, Casemiro chuan uiawm takin a ti-goal lo bawk - Spurs tan Harry Kane-a'n vawi hnih David de Gea a enchhin tih loh chu chhuan tur a awm lo.

Spurs boss Antonio Conte chua, "Table-ah kan dinhmun ṭha mah se, game level sang kan khelh apiangin kan buai zel. Chelsea kan draw khan minute 92 hnuah kan khung hram a, Arsenal lakah kan tlawm a, United lakah kan tlawm leh ta. Game level a san chuan a harsa ang tih chu hriat sa a ni a, khelmual chhung leh pawnah hmasawn tura kan beih a ngai a ni," a ti.

Ronaldo kha
Nipui laia chhuah dil Ronaldo an chelh a, mahse, Ten Hag-a'n game pawimawhah chhawr a tum lo - a team ten khel ṭha mah se Ronaldo a lungawi lo a, inkhelh zawh hmain a chhuak.

England legend Gary Lineker chuan, "A chet dan kha a dik lo takzet a, pawmzam theih a ni lo," tiin Ronaldo a dem. England defender hlui Micah Richards chuan, "Khawvela a ṭha ber pawlin an team chak laia a chanchin sawi tur heti zawnga a lo hnutchhiah hi a ṭha lo a ni," a ti.

United legend Peter Schmeichel chuan, "Ronaldo lamah ka ṭang fo ṭhin. Mahse, a vawi khat nan min tihnual hle a ni," a ti - Ten Hag-a'n Ronaldo a titipui tur thu a sawi a, kum 37 mi forward hi kawl reng chi a ni em?

United coach chuan, "Tlarhnung leh hma ngaihtuah reng player 11 kan hmu a, an inkhel kha an phur hle. Ka naute khelh danah ka lawm a, ka lungsi zan e, erawh ka ti ngam lo. 'A ṭha' tih ringawt hi ṭha tak tak a tling lo a, chu chu Manchester United-ah chuan inteh nan kan hmang tur a ni," a ti a, a la duhkhawp lo.